Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 306 Hüküm no: 340 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici Mustafa Ağa’nın eskici dükkânını oğlu Süleyman’a satması Eskici mübâya‘ası, 10000 guruş Vilâyet-i Anadolu’da Niğde sancağında Develi kazâsına tâbi‘ Finase karyesi ahâlisinden ve eskici esnâfından Mustafa Ağa b. Mustafa tarafından bir kıt‘a isbât-ı vekâlet hücceti nâtıka olduğu üzere vekîl olduğu Meclis-i Hikmet’de bulunan esnâf-ı mezbûre kethudâsı Hafız Süleyman Ağa b. el-Hâc Halil ve Mustafa Ağa b. Hüseyin şehâdetleriyle sâbit olan es-Seyyid İbrahim Ağa b. Abdullah meclis-i şer‘-i şerîf-i enverde müvekkil-i merkūmun sulbî oğlu işbu bâ‘isü’l-vesîka Süleyman Ağa mahzarında bi’l-vekâle ikrâr-ı tam ve takrîr-i kelâm edip mahmiye-i İstanbul’da Parmakkapı dâhilinde Mehmed Salih Ağa ve Ömer Ağa dükkânları beynlerinde kâin bir bâb eskici dükkânı müvekkilim mezbûrun bâ-temessük-i mütevellî taht-ı tasarrufunda ve derûnunda mevcûde beyne’l-esnâf gedik ta‘bîr olunur bir destgâh ve dört bıçkı ve sekiz kalıb ve bir akçe tahtası ve iki minder ve sâir âlât-ı lâzıme-i ma‘lûme müstakılleten yedinde emvâli olmağla ben âlât-ı muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile oğlu mezbûr Süleyman Ağa’ya on bin guruşa bi’l-vekâle bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra müvekkilim merkūmun oğlu müşteri-yi merkūma zimmetinde cihet-i karzdan iki bin beş yüz guruş deyni olmağla semeni olan meblağ-ı mezbûr on bin guruşun iki bin beş yüz guruşunu deyni olan meblağ-ı mezbûr iki bin beş yüz guruşa bi’l-vekâletakas ve mahsûb ve her birimiz ber-vech-i muharrer mukāssa ve kabûl etmemizle bâkīsi olan yedi bin beş yüz guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim fîmâ-ba‘d âlât-ı muharrere-i mezkûre merkūm Süleyman Ağa’nın emvâl-i müşterâsı ve hakk-ı sırfı olup müvekkilim merkūmun kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 14 B sene [1]242. Şühûdü’l-hâl: Kethudâsı Hafız Süleyman Ağa b. el-Hâc Halil, Mustafa Ağa b. Hüseyin, Ali Çelebi el-muhzır, Ebûbekir Çelebi el-muhzır, es-Seyyid el-Hâc Mustafa Ağa b. Mehmed.