Bab Mahkemesi 54 Numaralı Sicil (H. 1102 / M. 1691) cilt: 20, sayfa: 140 Hüküm no: 132 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ebûbekir Ağa b. Mahmud’un tuz mahzenini Hamide Hatun’a meccânen terk ettiği Husûs-ı âti’l-beyânın mahallinde tahrîri için savb-ı şer‘-i enverden bi’l-iltimâs Murtaza Efendi b. İshak irsâl olunup, ol dahi zeyl-i sütûrda muharrerü’l-esâmi olan müslimîn ile mahmiye-i mezbûrede Mimar Ayas mahallesinde arpacı tâifesinden el-Hâc Ebûbekir Ağa b. Mahmud b. Derviş nâm kimesnenin sâkin olduğu menziline varıp akd-i meclis-i şer‘î nebevî eylediklerinde, merkūm el-Hâc Ebûbekir Ağa meclis-i ma‘kūd-ı merkūmda hâlâ zevce-i menkûhası olup, zâtı ma‘rifet-i şer‘iyye ile ârifân mahalle-i mezbûre sükkânından İmâm Abdüllatîf Efendi b. Mehmed ve İbrahim Efendi b. el-Hâc Mehmed ta‘rîfleriyle mu‘arrefe olan işbu bâ‘isetü’l-kitâb Hamide b. el-Hâc ( ) nâm hâtun mahzarında ikrâr-ı tâm ve takrîr-i kelâm edip, işbu el-Hâc Abdullah Çelebi b. Şaban câbîsi olduğu Şehîd Mehmed Paşa Vakfı’ndan icâreteyn-i ma‘lûmeteyn ile taht-ı tasarrufunda olup, mahalle-i mezbûre hısn ebvâbı hâricinde Balıkpazarı sûkunda vâki‘ bir tarafdan âhar tasarrufunda olan vakıf menzil ve iki tarafdan İvaz Abdullah Ağa tarafında olan vakıf menzili ve taraf-ı râbi‘i tarîk-i âm ile mahdûd fevkānî ve tahtânî bir bâb kirpi sakıflı tuz mahzeni demekle ma‘rûf tahta kapılı mahzeni, bi cümleti’t-tevâbi‘ ve’l-levâhık vakf-ı mezbûr mütevellîsi ma‘rifetiyle zevce-i mezbûre Hamide Hâtun’a meccânen ferâğ ve tefvîz, ol dahi ber vech-i muharrer tefevvüz ve kabûl eyledi. Min ba‘d mahzen-i mahdûd-ı mezkûrda kat‘â alâka ve medhalim kalmayıp, mezbûr Hamide Hâtun’un hakk-ı müfevvazıdır dedikde, gıbbe’t-tasdîki’ş-şer‘î husûs-ı mezkûru mevlânâ-yı mezbûr mahallinde ketb ü tahrîr, ba‘dehû ma‘an irsâl olunan Çukadâr Mehmed Beşe b. Mustafa ve İbrahim Çelebi b. Mehmed ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: es-Seyyid Hüseyin Ağa b. es-Seyyid Mahmud kavukcu?, Mehmed Ağa b. Ahmed Ağa, es-Seyyid Hasan Çelebi b. Mustafa, Ali Çelebi b. Mehmed, Mehmed Çelebi b. Mustafa, Osman ...?, Müezzin Mustafa Halîfe, el-Hâc Kenan b. Abdullah, Kemaleddin b. Ahmed, Hüseyin Çelebi b. Abdullah, Abdülkādir Beşe b. Receb berşci?, İbrahim b. Mustafa el-Hâc, Abdullah Efendi el-kâtib.