Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 307 Hüküm no: 341 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. İsmail’in bazı ev eşyalarını eşine satması Eşyâ mübâya‘ası, nefy, 250 guruş Mahmiye-i İstanbul’da Akbıyık mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Hadice bt. İsmail b. Ahmed nâm hatun meclis-i şer‘-i şerîf-i enverde hâlâ zevci işbu bâ‘isü’l-vesîka Hasan Ağa b. Ömer mahzarında ikrâr-ı tam ve takrîr-i kelâm edip eşyâ-yı memlûkemden üç minder ve on iki yasdık ve bir keçe ve üç mak‘ad ve beş sahan ma‘a kapak ve beş tencere ma‘a kapak ve bir ta‘âm sinisi ve bir kadayıf tepsisi ve bir mangal ve bir leğen ma‘a ibrik ve üç yorgan ma‘a çârşeb ve iki şilte ve iki baş yasdığı ve üç entari ve iki şalvar ve bir nîmten kürk ve bir çuka ferâcemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim merkūm Hasan Ağa’ya iki yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki yüz elli guruşu zevcim merkūm bana def‘ ü teslîm ben dahi yedinden tamamen ahz ü kabz eyledim fîmâ-ba‘d eşyâ-yı muharrere-i mezkûre zevcim merkūm Hasan Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eylediğimizden mâ‘adâ zevcim merkūm Hasan Ağa ile ma‘an sâkine olduğum menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u zevcim merkūmun malı olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 15 B sene [1]242. Şühûdü’l-hâl: Derviş Mehmed Efendi, Muhzır Ebûbekir Çelebi, Muhzır Ali Çelebi, Hafız Mehmed Emin Efendi.