Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 307 Hüküm no: 342 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in velayetinde bulunan küçük torunu Mehmed için babası tarafından nafaka tahsis edilmesi Nafaka-i sagīr, 15 guruş Mahmiye-i İstanbul’da Balat kurbünde Çinili Çeşme mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Ayşe bt. İbrahim nâm hatun meclis-i şer‘-i şerîf-i enverde dâmâdı es-Seyyid Hafız Ahmed Efendi b. Ahmed mahzarında ikrâr-ı tam ve takrîr-i kelâm edip kızım işbu hâzıratü bi’l-meclis Fatıma Hatun bt. Mehmed mezbûr es-Seyyid Hafız Ahmed ile zevciyet beynlerinde kāime iken mezbûrun firâşından hâsıl ve kızım mezbûreden mütevellid es-Seyyid Mehmed nâm sagīr bi-hakkı’l-hıdâne kızım mezbûrenin hacr ve terbiyesinde iken kızım hâzıra-i mezbûre nefsini âhara tezvîc birle hakk-ı hıdâne kendinden sâkıt ve bana âid olup ol-vechile sagīr-i mezbûr hâlâ bi-hakkı’l-hıdâne hacr ve terbiyemde olup lâkin sagīr-i mezbûrun malı olmayıp nafakaya muhtâc olmağla sagīr-i mezbûrun nafaka ve kisve ve sâir levâzım-ı zarûriyesi için babası mezbûr üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve ve sâir levâzım-ı zarûriyesi için babası merkūm üzerine târih-i vesîkadan beher mâh on beşer guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a büyük vâlidesi ve hâdinesi mezbûre Âişe Hatun’a izin vermeğin mâ-vaka‘a [bi’t-taleb ketb olundu.] Fî 10 B sene [1]242. Şühûdü’l-hâl: Muhzır Emin Çelebi, Muhzır Mehmed Çelebi.