Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 308 Hüküm no: 343 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parmakkapı dahilinde çeşme bitişiğindeki eskici dükkânı gediğinin Seyyid İbrahim’in olduğunun tescili İhbâr hücceti Mahmiye-i İstanbul’da Unkapanı kurbünde Harâccı mahallesinde sâkin Eskici esnâfından es-Seyyid İbrahim Ağa b. Abdullah meclis-i şer‘-i şerîf-i enverde esnâf-ı merkūme kethudâsı Hafız Süleyman Ağa b. el-Hâc Halil ve Mustafa Ağa b. Hüseyin ve es-Seyyid el-Hâc Mustafa Ağa b. Mehmed hâzır olduğu hâlde takrîr-i kelâm ve ta‘bîr ani’l-merâm edip mahmiye-i mezbûrede Parmakkapı dâhilinde çeşme ittisâlinde vâki‘ bir bâb eskici dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme müddet-i vâfireden beri ve şirâen bâ-hüccet-i şer‘iye müstakıllen yedimde emvâlim olup lâkin yedimde olan hüccetim bundan akdem vukū‘ bulan harîkde muhterik olup ol-vechile yedimde sened-i şer‘iyem olmamağla hakīkat-i hâl hâzırûn-ı merkūmûndan lede’l-istihbâr kıbel-i şer‘den yedime li-ecli’l-istihkâm bir kıt‘a hüccet-i şer‘iye i‘tâ olunmak matlûbumdur dedikde hâl bâlâda bast ü beyân olunan minvâl-i muharrer üzere olup zikr olunan dükkân derûnunda mevcûde bâ-defter-i müfredât âlât-ı lâzıme-i ma‘lûme mezbûr es-Seyyid İbrahim Ağa’nın müddet-i vâfireden beri şirâen yedinde bâ-hüccet emvâli olduğunu hâzırûn-ı merkūmûndan her biri meclis-i şer‘de alâ-tarîki’ş-şehâde haber vermeleriyle vâki‘u’l-hâl [60a] hıfzen li’l-makāl işbu vesîka-i enîka bi’t-taleb ketb ü tahrîr ve li-ecli’l-istihkâm merkūm es-Seyyid İbrahim Ağa’nın yedine i‘tâ olundu. Fî 14 B sene [1]242. Şühûdü’l-hâl: Muhzır Ali Çelebi, Mehmed Çelebi el-muhzır, Feyzullah Çelebi el-muhzır.