Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 309 Hüküm no: 345 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Züleyha bt. Hasan’ın eski eşinden olan küçük oğlu Seyyid İsmail için babası Menzilcioğlu Seyyid Mehmed Tahir üzerine nafaka takdir olunması Nafaka-i sagīr, 17 guruş Mahmiye-i İstanbul’da Sultan Mehmed Câmi‘-i şerîfi kurbünde Altıay Çeşmesi’nde sâkine işbu bâ‘isetü’l-vesîka Züleyha bt. Hasan b. Abdullah’ın karındaşı ve tarafından husûs-ı âti’l-beyânda vekîli olduğu zât-ı mezbûreyi ârifân el-Hâc Ahmed b. el-Hâc Numan ve Mehmed b. Musa şehâdetleriyle sâbit olan Osman b. el-mezbûr Hasan meclis-i şer‘-i şerîf-i enverde Karahisar-ı şarkīli <> ve sakalar bölükbaşısı Menzilcioğlu es-Seyyid Mehmed Tâhir b. es-Seyyid Ahmed mahzarında bi’l-vekâle ikrâr-ı tam ve takrîr-i kelâm edip karındaşım müvekkilem mezbûre merkūm es-Seyyid Mehmed Tâhir ile zevciyet beynlerinde kāime iken mezbûrun firâşından hâsıl ve müvekkilem mezbûreden mütevellid ve bi-hakkı’l-hıdâne hacr ve terbiyesinde olan tahmînen yirmi üç günlük oğlu es-Seyyid İsmail nâm sagīrin malı olmayıp nafakaya eşedd-i ihtiyâc ile muhtâc olmağla sagīr-i mezbûrun nafaka ve kisve ve sâir levâzım-ı zarûriyesi için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak müvekkilem mezbûrenin bi’l-hıdâne matlubudur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve ve sâir levâzım-ı zarûriyesi için babası merkūm üzerine târih-i kitâbdan beher mâh on yedi guruş farz ve takdîr buyurup meblağ-ı mefrûz-ı mezkûru sagīr-i mezbûr İsmail’in nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi müvekkile-i mezbûre Züleyha Hatun’a izin vermeğin mâ-vaka‘a [bi’t-taleb ketb olundu.] Fî 10 B sene [1]242. Şühûdü’l-hâl: Muhzır Ali Çelebi, Dîvân-ı hümâyûn Çavuşlarından Ahmed Ağa, Muhzır Emin Çelebi.