Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 311 Hüküm no: 347 Orijinal metin no: [60a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Osman’ın bazı eşyalarını sattığı Veliyüddin’i alacağının tahsili için vekil tayin etmesi Mübâya‘a takas, mahsûb, 280 guruş Vilâyet-i Anadolu’da Isparta sancağında Eğirdir kasabası ahâlisinden olup medîne-i Üsküdar’da sâkin Mustafa b. Osman meclis-i şer‘-i şerîf-i enverde işbu bâ‘isü’l-vesîka Veliyüddin b. İbrahim muvâcehesinde ikrâr-ı tam ve takrîr-i kelâm edip müstakıllen mülk ve malım olup kasaba-i mezbûre hâricinde vâki‘ bir tarafdan Hüseyin bağı ve bir tarafdan Yagob bağı, Demirci bağı ve bir tarafdan tarîk-i âm ile mahdûd bir bâb köşkü müştemil bir kıt‘a kürûmu mülk bağ ve kasaba-i mezbûre sâkinlerinden Hüseyin nâm kimesnenin bi’l-emâne yed ve hıfzında olan bir kelâm-ı kadîm ve bir döşek ve bir yorgan ve bir yasdık ve bir kilim ve bir at başlığı ve bir eğer takımımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Veliyüddin’e iki yüz seksen guruşa bey‘ ü temlik ve mahâllinde ahz ü kabza tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr ikiyüz seksen guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim fîmâ-ba‘d sâlifü’l-beyân bağ ve bir Kelâm-ı kadîm ve bir döşek ve bir yorgan ve bir yasdık ve bir kilim ve bir at başlığı ve bir eyer takımı mezbûr Veliyüddin’in mâl-ı müşterâsı ve hakk-ı sırfı olup benim kat‘a alâka ve medhalim kalmamağla benim mezbûr Veliyüddin’e zimmetimde cihet-i deyn-i şer‘îden iki yüz yirmi guruş deynim olup benim dahi mezbûr Hüseyin zimmetinde bârgir semeninden iki yüz yirmi guruş alacağım olmağla meblağ-ı mezbûru mahâllinde merkūm Hüseyin’den taleb ve da‘vâ ve ahz ü kabza ve makbûzunu alacağı olan meblağ-ı mezbûra takas ve mahsûba mezbûr Veliyüddin’i tarafımdan tevkîl eylediğimde ol dahi ber-vech-i muharrer vekâlet-i mezbûreyi kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 13 B sene [1]242. Şühûdü’l-hâl: el-Hâc Mahmud b. Mehmed, es-Seyyid el-Hâc Salih b. el-Hâc Mehmed, Yusuf b. Mustafa, es-Seyyid Abdullah b. Ömer, es-Seyyid el-Hâc Süleyman, Ahmed Ağa b. İbrahim, Hasan Ağa b. Mehmed, el-Hâc Ahmed b. Mehmed.