Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 311 Hüküm no: 348 Orijinal metin no: [60a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şam tüccarından Hacı Mehmed Ağa’nın menzilini Mehmed Sadık Ağa’ya satması Menzil mübâya‘ası, 500 guruş Mahrûse-i Galata’ya muzâfe kasaba-i Beşiktaş civârında Kabataş nâm mahâlde sâkin Şâm-ı şerîf tüccârından el-Hâc Mehmed Ağa b. Osman meclis-i şer‘-i şerîf-i enverde işbu bâ‘isü’l-vesîka Kethudâ-yı Ab-ı râhî Mehmed Sadık Ağa b. Halil mahzarında ikrâr-ı tam ve takrîr-i kelâm edip mahmiye-i İstanbul’da Atpazarı civârında Hüsam mahallesinde destgâhçılar sûkunda vâki‘ bir tarafdan ba‘zan el-Hâc Mehmed Ağa menzili ve ba‘zan Doğramacıoğulları Mehmed ve Ahmed ve İbrahim menzili ve bahçesi ve bir tarafdan Destgâhçılar tarîk caddesi ve bir tarafdan tarîk-i hâs derûnunda kapıdan ifrâz olunan sokak ve bir tarafdan Hasan Ağa menzili ile mahdûd ve müştemilât-ı ma‘lûmeyi hâvî bir bâb menzilin ancak matbah ve fırın ve su hazînesi ve tulumba ve doksan altı zirâ‘ neccâr-kârî parmaklıklı bahçe ve müşterek taş duvar ve bir müstakıllen taş duvar ile muhât menzil-i mahdûd-ı mezkûrun mülk olan mahâlli akd-i âti’z-zikrin sudûruna değin bâ-hüccet-i şer‘iye müstakıllen yedimde mülk ve mâ‘adâsı bâ-temessük-i mütevellî bi’l-icâreteyn taht-ı tasarrufumda olmağla hâlâ ben menzil-i mezkûrun mülk olan mahâllini bi-cümletin mâ-yeştemilehû ve yahviyehû tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile [60b] merkūm Mehmed Sadık Ağa’ya beşyüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruşu müşteri-yi merkūm bana def‘ ü teslîm ben dahi yedinden ahz ü kabz eyledim fîmâ-ba‘d menzil-i mahdûd-ı mezkûrun sâlifü’l-beyân mülk olan mahâlli merkūm Mehmed Sadık Ağa’nın mülk-i müşterâsı ve hakk-ı sırfı olup benim mülk olan mahâllinde kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 14 B sene [1]242. Şühûdü’l-hâl: Muhzır Emin Çelebi, Muhzır Ali Çelebi, İmâm Ali Efendi, Müezzin Mehmed Efendi, es-Seyyid Ali Ağa, Yorgânî el-Hâc Ahmed Ağa, Penbecizâde Hasan Ağa, Berber Emin Ağa, Destgâhçı Ali Ağa.