Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 312 Hüküm no: 349 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici esnafından Mustafa Ağa’nın bazı kimselerde olan alacaklarını tahsil ve borçlarını ödemek üzere Seyyid İbrahim Ağa’yı vekil tayin etmesi İsbât-ı Vekâlet hücceti Vilâyet-i Anadolu’da Niğde sancağında Develi kazâsına tâbi‘ Finase karyesi ahâlisinden ve eskici esnâfından Mustafa Ağa b. Mustafa b. Abdullah tarafından ber-vech-i âtî vekâlet iddi‘â eden esnâf-ı mezbûre kethudâsı işbu bâ‘isü’l-vesîka es-Seyyid İbrahim Ağa b. Abdullah meclis-i şer‘-i şerîf-i enverde Ali Ağa b. Ali mahzarında üzerine da‘vâ ve takrîr-i kelâm edip mezbûr Mustafa Ağa’nın merkūm Ali Ağa zimmetinde cihet-i karzdan elli guruş alacak hakkı olmağla meblağ-ı mezbûru merkūmdan taleb ve da‘vâ ve ahz ü kabza ve mahmiye-i İstanbul’da Parmakkapı dâhilinde Şerîf Salih Ağa ve Ömer Ağa dükkânları beynlerinde kâin bir bâb vakıf eskici dükkânı bâ-temessük-i mütevellî merkūm Mustafa Ağa’nın taht-ı tasarrufunda ve derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmesi semen-i misliyle âhara bey‘e ve kabz-ı semene ve oğlu işbu hâzır bi’l-meclis Süleyman’a zimmetinde cihet-i karzdan iki bin beş yüz guruş ve gāib ani’l-meclis Ali Ağa’ya zimmetinde cihet-i deyn-i şer‘îden yedi bin beş yüz guruş deyni olmağla makbûzundan deynlerini edâya merkūm Mustafa Ağa bundan akdem diyâr-ı âhara âzim oldukda şühûd mahzarlarında beni tarafından vekîl nasb ü ta‘yîn eylediğinde ben dahi vekâlet-i mezkûreyi kabûl etmemle meblağ-ı mezbûr elli guruşu vekâletim hasebiyle mezbûr Ali Ağa’dan taleb ederim suâl olunsun dedikde gıbbe’s-suâl mezbûr Ali Ağa cevâbında merkūm Mustafa Ağa’ya cihet-i mezbûreden zimmetinde elli guruş deyni olduğunu ikrâr, mezbûr es-Seyyid İbrahim Ağa’nın vekâleti ma‘lûmum değildir deyü inkâr edicek, müdde‘î-i vekîl-i mezbûrdan ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve esnâf-ı mezkûreden Mustafa Ağa b. Hüseyin ve Ömer Ağa b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Mustafa Ağa’nın merkūm Ali Ağa zimmetinde cihet-i karzdan elli guruş alacak hakkı olmağla meblağ-ı mezbûru merkūmdan ve mahmiye-i İstanbul’da Parmakkapı dâhilinde Şerif Salih Ağa ve Ömer Ağa dükkânları beynlerinde kâin bir bâb vakıf dükkân bâ-temessük-i mütevellî taht-ı tasarrufunda ve derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme müstakıllen yedinde malı olmağla âlât-ı lâzıme-i ma‘lûmesi semen-i misliyle âhara bey‘e ve kabz-ı semene ve oğlu işbu hâzır bi’l-meclis Süleyman Ağa’ya zimmetinde cihet-i karzdan iki bin beş yüz guruş ve gāib ani’l-meclis Ali Ağa’ya cihet-i deyn-i şer‘îden yedi bin beş yüz guruş deyni olmağla makbûzundan deynini edâya mezbûr Mustafa Ağa bundan diyâr-ı âhara âzim oldukda işbu müdde‘î-i merkūm es-Seyyid İbrahim Ağa’yı tarafından bizim huzûrumuzda vekîl nasb ü ta‘yîn eylediğinde ol dahi ber-vech-i muharrer vekâlet-i mezkûreyi kabûl eyledi, biz bu husûsa bu vech üzere şâhidleriz ve şehâdet dahi ederiz deyü her biri müttefikü’l-lafz ve’l-ma‘nâ edâ-yı şehâdet-i şer‘iye ettiklerinde gıbbe-ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a [bi’t-taleb ketb olundu.] Fî 13 B sene [1]242. Şühûdü’l-hâl: Muhzır Ali Çelebi, Kethudâ Hafız Süleyman Ağa b. el-Hâc Halil, Mustafa b. Hüseyin, es-Seyyid el-Hâc Mustafa Ağa b. Mehmed, Muhzır Ebûbekir Çelebi. <> (sehven kayd olunup kenâr iki kâğıd yukarıya sahîh kayd olunmuşdur. Sahîh, sahîh).