Bab Mahkemesi 54 Numaralı Sicil (H. 1102 / M. 1691) cilt: 20, sayfa: 141 Hüküm no: 133 Orijinal metin no: [21a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın köle ve cariye hak sahipliği iddiasının reddi Fi’l-asl mahrûse-i Belgrad’da sâkin olup hâlâ Galata kazâsına tâbi‘ Tophâne’de müsâferet vechi üzre sâkine Hatice bt. Abdullah nâm hâtun ba‘de’t-ta‘rîfi’ş-şer‘î meclis-i şer‘de bâ‘isü hâze’l-kitâb Osman b. Ebûbekir mahzarında üzerine da‘vâ ve takrîr-i kelâm edip, mezbûr Osman mukaddemâ iki yüz elli guruş kıymetli Nemçeviyyü’l-asl üç yaşında bir gulâm ile sekiz yaşında bir câriyemi bi gayri hakkın ahz u kabz etmeğin, hâlâ suâl olunup mevcûd ise aynlarını değil ise kıymet-i şer‘iyyelerini bana edâ ve teslîme tenbîh olunmak matlûbumdur dedikde, gıbbe’s-suâl mezbûr Osman cevâbında, ben mukaddemâ abd-i memlûküm olan gulâm-ı mezbûr ile câriye-i mezbûrumu bi tarîki’l-emâne kendiye teslîm, ol dahi tesellüm edip ba‘dehû yine kendiden taleb eylediğimde mezbûrân mülk ve hakkım olduğunu ba‘de’l-i‘tirâf bana teslîm, ben dahi kabz ve tesellüm etmiş idim deyu def‘le mukābele edicek, gıbbe’l-istintâk ve’l-inkâr, mezbûr Osman’dan def‘-i meşrûhuna beyyine taleb olundukda, zât-ı mezbûreyi ma‘rifet-i şer‘iyye ile ârifân udûl-i ahrâr-ı ricâlden [21b] hâlâ mahmiye-i İstanbul’da Firuzağa mahallesinde sâkin İsmail Bey b. Ömer, Mercan Ağa mahallesinde sâkin Süleyman Ağa b. Veli nâm kimesneler li ecli’ş-şehâde meclis-i şer‘a hâzırân olup isre’l-istintâk, fi’l-vâki‘ işbu mezbûr Osman bundan akdem müdde‘î-i mezbûrdan Nemçeviyyü’l-asl üç yaşında bir gulâm ile sekiz yaşında bir câriyesini mezbûreye emânete vaz‘ etmek üzre taleb eyledikde, mezbûre Hatice Hâtun sagīrân-ı mezbûrânı merkūm Osman’ın memlûkeleri olup, kendi yedine emânet idüğini bizim huzûrumuzda ikrâr ve mezbûra teslîm, ol dahi kabz ve tesellüm etmiş idi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle mezbûre Hatice bî-vech mu‘ârazadan men‘ olunup, mâ vaka‘a bi’t-taleb ketb olundu. Fî yevm-i evâsıtı şehri Rebî‘u’lâhir li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim Halil b. Ahmed, Mustafa b. Ahmed, Mustafa b. Şaban.