Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 315 Hüküm no: 351 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in terzi dükkânı gediğini satması Terzi gediği, 2500 guruş. Mahmiye-i İstanbul’da Kocamustafapaşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Âişe bt. Mehmed Memiş nâm hatun meclis-i şer‘-i şerîf-i enverde Bogasıcı esnâfından işbu bâ‘iseyü’l-vesîka kendinden asıl ve sulbî oğlu el-Hâc Osman tarafından husûs-ı âti’l-beyânda tasdîka vekîl-i şer‘îsi es-Seyyid el-Hâc Mehmed b. es-Seyyid el-Hâc Osman mahzarında ikrâr-ı tam ve takrîr-i kelâm edip mahmiye-i mezbûrede Mercan Çarşısı kurbünde vâki‘ Perdahtçı Hanı ittisâlinde kâin bir kepenk bir bâb terzi dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye müstakılleten yedimde emvâlim olan bir destgâh ve bir endâze ve bir mikrâs ve bir minder ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūmân es-Seyyid el-Hâc Mehmed ve oğlu es-Seyyid Osman’a ale’l-iştirâki’s-seviyy iki bin beşyüz guruşa bey‘ ü temlik ve teslîm eylediğimde onlar dahi ber-vech-i muharrer iştirâken iştirâ ve temellük ve tesellüm ve kabz ü kabûl eylediklerinden sonra semeni olan meblağ-ı mezbûr iki bin beş yüz guruşu müşteriyân-ı merkūmân bana def‘ ü teslîm, ben dahi yedlerinden tamamen ahz ü kabz eyledim, fîmâ-ba‘d âlât-ı lâzıme-i muharrere-i mezkûre merkūm es-Seyyid el-Hâc Mehmed ve oğlu es-Seyyid Osman’ın ale’l-iştirâki’s-seviyy emvâl-i müşterâtları ve hakk-ı sırfları olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ancak bi’l-asâle ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 10 B sene [1]242. Şühûdü’l-hâl: Berber Mustafa Ağa, el-Hâc Mustafa Ağa, Yorgânî el-Hâc Osman Ağa, Hafız Mehmed Ağa, Muhzır Ebûbekir Çelebi, Muhzır Ali Çelebi