Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 316 Hüküm no: 352 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’in velayetinde bulunan küçük çocuğu Mustafa için babası tarafından nafaka tahsis olunması Nafaka-i sagīr, 15 guruş Mahrûse-i Galata’ya muzâfe kasaba-i Fındıklı nâm mahâlde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe bâ‘isetü’l-vesîka Âişe bt. Hüseyin nâm Hatun meclis-i şer‘-i şerîf-i enverde zevc-i sâbıkı es-Seyyid Hüseyin Ağa b. Ali mahzarında ikrâr-ı tam ve takrîr-i kelâm edip merkūm es-Seyyid Hüseyin Ağa ile zevciyet beynimizde kāime iken merkūmun firâşından hâsıl ve benden mütevellide ve bi-hakkı’l-hıdâne hâlâ hacr ve terbiyemde olan tahmînen dört buçuk yaşında sulbî oğlu Mustafa nâm sagīrenin malı olmayıp nafakaya eşedd-i ihtiyâç ile muhtâc olmağla sagīr-i mezbûrun nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve-bahâsı için babası merkūm üzerine târih-i vesîkadan beher mâh on beş guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Âişe Hatun’a izin vermeğin mâ-vaka‘a [bi’t-taleb ketb olundu.] Fî 18 B sene [1]242. Şühûdü’l-hâl: Muhzır Ali Çelebi, Muhzır Feyzullah Çelebi, Muhzır Emin Çelebi.