Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 317 Hüküm no: 353 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naile bt. Abdullah’ın bazı ev eşyalarını satması Husûs ile eşyâ, nefy, 80 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Mehmed Tâhir Efendi mahmiye-i İstanbul’da Saraçhâne kurbünde Çelebi Mehmed Ağa Hamamı ittisâlinde vâki‘ es-Seyyid Ömer Efendi b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde menzil-i merkūmda sâkine ve zâtı Müslimûn-ı merkūmûn ta‘rîfleriyle mu‘arrefe olan Nâile bt. Abdullah nâm hatun meclis-i ma‘kūd-ı mezkûrda kezâlik zâtı mu‘arrefe işbu bâ‘isetü’l-vesîka Habibe bt. Hüseyin nâm hatun mahzarında ikrâr-ı tam ve takrîr-i kelâm edip eşyâ-yı memlûkemden iki minder ve bir döşek ve iki baş yasdığı ve üç yorgan ve bir çuka ferâce ve iki entari ve üç gömlek ve bir ihrâm ve beş sahan ma‘a kapak ve üç tencere ve bir mangal ve bir sini ve bir câmeşûy tenceresi ve bir güğüm ve bir şorba tası tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre Habibe Hatun’a seksen guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr seksen guruşu müşteriye-i mezbûre Habibe Hatun bana def‘ ü teslîm, ben dahi yedinden tamamen ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre mezbûre Habibe Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ işbu akd-i meclis olunan menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u mezbûre Habibe Hatun’un malı olup benim üzerime lâbise olduğum köhne libâsımdan gayrı ism-i mâl ıtlâk olunur bir nesne olmayıp ve mezbûre Habibe Hatun bundan akdem malından benim yedim ile Hâs ahurlu İbrahim Ağa’ya üç yüz guruş ikrâz ve merkūm İbrahim Ağa’nın zevcesi Hadice Hatun’a bir çift bileziğini yüz elli guruşa bey‘ etmekle ol-vechile mezbûrân İbrahim Ağa ve zevcesi mezbûre Hadice Hatun zimmetlerinde olan meblağ-ı mecmû‘-ı mezbûr beş yüz guruşu mezbûre Habibe Hatun’un malı [olup] benim kat‘a alâka ve medhalim yokdur dedikde gıbbe’t-tasdîki’ş-şer‘î vâki‘ hâli kâtib-i merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 16 B sene [1]242. Şühûdü’l-hâl: Kâtib Mustafa Efendi b. Hüseyin, Muharrem Ağa, Mehmed Emin Efendi, Sarrâc Hamid Ağa, Muhzır Ebûbekir Çelebi.