Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 318 Hüküm no: 354 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Zübeyde’nin mirasçılarının terekeden hisselerini teslim almaları Husûs ile terekeden ibrâ, Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Boluvîzâde müderrisîn-i kirâmdan es-Seyyid Mehmed Esad Efendi mahmiye-i İstanbul’da Süleymâniye kurbünde Sarı Bâyezid mahallesinde vâki‘ Mîzân-ı harîr emîni Süleyman Rıfat Efendi b. Mustafa’nın konağına [61b] varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde konağ-ı mezbûrda sâkine iken bundan akdem vefât eden Şerîfe Zübeyde bt. Mahmud b. Abdullah’ın verâseti zevc-i metrûku merkūm Süleyman Rıfat Efendi ile vâlidesi Şerife Habibe bt. es-Seyyid Mehmed nâm hatuna inhisârı tahakkukundan sonra zâtı Müslimûn-ı merkūmûn ta‘rîfleriyle mu‘arrefe olan mezbûre Şerîfe Habibe Hatun meclis-i ma‘kūd-ı mezkûrda işbu bâ‘isü’l-vesîka mûmâ-ileyh Süleyman Rıfat Efendi mahzarında bi’l-verâse ikrâr-ı tam ve takrîr-i kelâm edip mûrisem kızım müteveffât-ı mezbûre Şerife Zübeyde Hatun’un hîn-i vefâtında yanında mevcûde bi’l-cümle terekesini zevci mûmâ-ileyh Süleyman Rıfat Efendi bi’l-verâse ve bi’l-emâne ba‘de’l-kabz tereke-i müteveffât-ı mezbûr merkūm Süleyman Rıfat Efendi ile beynimizde bi’t-terâzî iktisâm ve her birimiz hisse-i irsiyemizi âhar yedinden tamamen ve kâmilen ahz ü kabz etmemizle mûrisem kızım müteveffât-ı mezbûrenin kalîl ü kesîr celîl ü hakīr bi’l-cümle terekesine ve hukūk-ı mîrâsa ve sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 16 B sene [1]242. Şühûdü’l-hâl: Es-Seyyid Hafız Salih Efendi, es-Seyyid Mehmed Ağa b. Halil, el-Hâc Eyüb Efendi b. Yakub, el-Hâc Mehmed Ağa b. Osman, es-Seyyid Ali Rıza Efendi, Muhzır Feyzullah Çelebi.