Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 319 Hüküm no: 355 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman’ın, Berber İbrahim ile olan ticaret ortaklığını feshederek birbirlerinin zimmetlerini ibra etmeleri Şirketden ibrâ, Vilâyet-i Anadolu’da Alâiye sancağında İbradi kasabası ahâlisinden olup mahmiye-i İstanbul’da Keçeciler Hanı’nda sâkin Küçük İsmail Efendizâde kuzâtdan es-Seyyid Osman Efendi meclis-i şer‘-i şerîf-i enverde işbu bâ‘isü’l-vesîka Berberzâde es-Seyyid el-Hâc İbrahim b. el-Hâc Mehmed mahzarında ikrâr-ı tam ve takrîr-i kelâm edip benim hâl-i sugrumda tesviye-i umûruma bâ-hüccet-i şer‘iye vasîyy-i mansûbem olan gāibete ani’l-meclis büyük vâlidem Ümmügülsüm bt. Mehmed ile nâzırım olan kezâlik gāib ani’l-meclis es-Seyyid İbrahim Efendi benim mâl-ı irsiyemden ma‘lûmü’l-mikdâr meblağ mudârebe tarîkiyle merkūm es-Seyyid el-Hâc İbrahim’e teslîm, ol dahi yedlerinden ahz ve kendi resi mâlına halt ve ben ba‘de’l-bulûğ meblağ-ı mezbûr ile fâide-i hâsıla beynimizde beraber iktisâm olunmak üzere bin ikiyüz yirmi senesinden işbu târih-i kitâba gelince yirmi iki sene merkūm el-Hâc İbrahim ile eşyâ-yı mütenevvi‘a bey‘ [ü] şirâsında şerîkler olup el-hâletü hâzihî biz müddet-i merkūmede bi’l-cümle şirket-i mezkûrenin hesâbını şühûd mahzarlarında yegân yegân rü’yet eylediğimizde müddet-i mezkûrede hâsıl olan fâide ile asıl re’s-i mâlımız olan ma‘lûmü’l-mikdâr meblağı her birimiz âharın yedinden tamamen ahz ü kabz edip hukūk-ı şirkete ve hesâbda sehv ü galat vukū‘una ve sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 5 B sene [1]242. Şühûdü’l-hâl: Es-Seyyid İsmail Efendi b. Ali, Küçük Ali Efendizâde es-Seyyid eş-Şeyh Mehmed Efendi, es-Seyyid Abdurrahman Ağa b. Veliyüddin, es-Seyyid Mehmed b. es-Seyyid Ahmed, es-Seyyid Osman b. İbrahim