Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 319 Hüküm no: 356 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Züleyha bt. Halil ile eşi Mehmed Emin Ağa’nın vefat eden oğulları Mehmed Nureddin Ağa’nın terekesini Ordu Defterdarı Hüseyin Bey’den teslim almaları Ahz [ü] kabz, ibrâ, 2112 guruş 12 para. Âsitâne-i aliyye ahâlisinden olup Yenişehir-i Fenar’da Defterdâr-ı Ordu-yı hazret-i Seraskerî Hüseyin Bey’in tütüncü arkadaşlık hizmetinde iken bundan akdem fevt olan Mehmed Nureddin Ağa’nın verâseti vâlidesi Züleyha bt. Halil ile babası Mehmed Emin Ağa b. Yusuf’a inhisârı tahakkukundan sonra kendiden asıl ve zevcesi mezbûre Züleyha Hatun tarafından husûs-ı âti’l-beyânda vekîl olduğu zâtını ârifân Mehmed b. İbrahim ve Mustafa b. İbrahim şehâdetleriyle sâbit olan mezbûr Mehmed Emin Ağa meclis-i şer‘-i şerîf-i enverde tereke-i müteveffâ-yı mezbûra bi’l-asâle vaz‘-ı yedi mütehakkık olan işbu bâ‘isü’l-vesîka el-Hâc Mehmed Ağa mahzarında bi’l-asâle ve bi’l-vekâle ve bi’l-verâse ikrâr-ı tam ve takrîr-i kelâm edip mûrisim oğlum müteveffâ-yı mezbûrun hîn-i vefâtında yanında mevcûde ma‘rifet-i şer‘le tahrîr ve bey‘ olunan terekesi esmânından ba‘de ihrâci’l-mesârifi’l-lâzıme sahhu’l-bâkī bâ-defter-i kassâm bi’l-vesâye makbûzu olan iki bin yüz on iki guruş on iki parayı vasîyy-i merkūm işbu meclis-i şer‘de bana def‘ ü teslîm, ben dahi yedinden bi’l-asâle ve bi’l-vekâle tamamen ahz ü kabz edip min-ba‘d meblağ-ı mezbûrdan gerek mezbûr Hüseyin Bey’in ve gerek vasîyy-i merkūm el-Hâc Mehmed Ağa’nın yedinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 21 B sene [1]242. Şühûdü’l-hâl: Mehmed Ağa b. İbrahim, Ali Çelebi el-muhzır, Abdulfettah Çelebi el-muhzır, Mustafa Ağa b. İbrahim.