Bab Mahkemesi 54 Numaralı Sicil (H. 1102 / M. 1691) cilt: 20, sayfa: 142 Hüküm no: 134 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Bursevî Mehmed Efendi’nin menzil vakfiyesi Elhamdü lillâhi vâkıfı alâ külli hâli el-muttali‘ı alâ mâ hâli fi’l-bâl, âlemi’l-gaybi ve’ş-şehâdeti’l-kebîri’l-müte‘âl, ve’s-salâtü ve’s-selâmü alâ seyyidinâ erbâbi’l-kemâl Muhammedini’l-mevsûf bi mekârimi’l-ahlâk ve ekârimi’l-hisâl ve alâ âlihî ve ashâbihî hayra sahb ve âl. Ve ba‘d bâ‘is-i tenmîk-i kabâle-i makbûletü’l-fehvâ ve dâ‘î-i tasvîri’l-makaleti ma‘kūletü’l-ma‘na oldur ki, sâbıkan Şeyhülislâm olduğundan sonra vedâ‘-ı âlemü’l-fânî eden merhûm ve mağfûrun-leh Bursevî Mehmed Efendi’nin kerîme-i mükerremeleri olan fahrü’l-muhadderât tâcü’l-mekânât sâhibetü’l-hayrât ve’l-hasenât tâlibetü’s-sadakāt ve’l-meberrât Fâtıma Hâtun hazretleri taraf-ı şereflerinden vakf-ı âti’l-beyâna ba‘dehû da‘vâ-yı rücû‘ ve istirdâda vekîl olduğu zât-ı müşârün-ileyhâyı ma‘rifet-i şer‘le ârifân Mehmed Efendi b. Musa ve Mustafa Efendi b. İbrahim nâm kimesneler şehâdetleriyle şer‘an sâbit olan fahrü’l-kuzâti’l-müteşerri‘în Mehmed Efendi b. Resul nâm kimesne meclis-i şer‘-i şerîf-i şâmihu’l-imâd ve mahfil-i münîf-i râsihü’l-evtâdda, vakf-ı âti’l-beyânı li ecli’t-tescîl ve li itmâmi emrihi’l-müzeyyel mütevellî nasb ve ta‘yîn olunan Yakub Çelebi b. Ramazan nâm kimesne mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp, müvekkil-i mûmâ-ileyhâ Fâtıma Hâtun silk-i mülk-i sahîhinde münselik ve münderic olup, Dârü’l-hilâfeti’l-aliyye Kostantıniyye el-mahmiye’de Molla Aşkī mahallesinde vâki‘ bir tarafdan Receb Beşe mülkü ve bir tarafdan Yedekci Mehmed mülkü ve iki tarafından tarîk-i âm ile mahdûd dâhiliyesi dört bâb fevkānî oda ve mahzen ve fırın ve mahavvata ve hadîka ve kenîf ve hâriciyesi tahtânî bir bâb oda ve kule ve bi’r-i mâ ve hadîkayı müştemil menzilini ve yine mahmiye-i mezbûrede Keçeci Pîrî mahallesinde vâki‘ bir tarafdan Bogasici mülkü ve bir tarafdan imâma meşrûta vakıf menzil ve bir tarafdan İsmihân Hâtun mülkü ve bir tarafdan tarîk-i âm ile mahdûd müceddeden binâ eylediği altı bâb odaları müştemil mülk menzilini ve mahmiye-i mezbûrede Tercüman Yunus mahallesinde vâki‘ etrâf-ı erba‘ası şeyhe meşrûta menzil ve eş-Şeyh Ömer Efendi veresesi mülkleri ve Şaban Efendi Vakfı’nda sulehâya meşrûta menzil ve tarîk-i âm ile mahdûd müceddeden binâ eylediği tahtânî dört bâb odaları müştemil mülk menzilini, hasbeten lillâhi’l-hamîd ve taleben li merzâti’r-rabbi’l-ehad vakf-ı sahîh-i muhalled ve habs-i sarîh-i müebbed ile vakf ve habs edip şöyle şart eyledi ki, zikr olunan menâzil yed-i mütevellî ve ecr-i misli ile âhara îcâr olunup hâsıl olan ücretinden yevmî ikişer akçe vazîfe ile mahmiye-i mezbûrede Bâzergân Mescid-i şerîfinde yedi cüz’-i şerîf vaz‘ ve kırâ’at olunup, birinin sevâbını sultân-ı kevneyn ve Rasûli’s-sakaleyn -sallallâhu aleyhi ve sellem- hazretlerinin rûh-ı şerîflerine ihdâ olunup ve bir cüz’-i şerîfin sevâbı dahi çehâr-yâr-ı güzîn -rıdvânullâhi te‘âlâ aleyhim- ervâh-ı şerîflerine ihdâ oluna ve birer cüz’-i şerîfin sevâbı kendi rûhlarına ve bir cüz’-i şerîfin sevâbı dahi vâlideleri rûhuna ihdâ oluna ve üç akçe vazîfe dahi cihet-i tevliyet oluna ve tevliyet-i merkūme hayâtda olduklarınca kendilere ba‘dehâ evlâdına ve evlâd-ı evlâdına ve evlâd-ı evlâdına meşrûta olup, ba‘dehüm re’y-i hâkimü’ş-şer‘a müfevvaz ola. Vakf-ı mezbûrun tebdîli ve tağyîri ve taklîli ve teksîri merreten ba‘de uhrâ yedinde ola ve mürûr-ı eyyâm ile ve şurût-ı mezkûreye ri‘âyet müte‘azzire olursa, galle-i vakf-ı mezbûr mutlaka fukarâ-yı müslimîne sarf oluna deyu ta‘yîn-i şart ve tebyîn-i kuyûd eyleyip, mârru’z-zikr menâzil-i selâsenin her birini fâriğan ani’ş-şevâgil mütevellî-i mezbûra teslîm, ol dahi tesellüm ve kabz ve sâir mütevellîlerin evkāfına tasarrufları gibi tasarruf eyledi dedikde, gıbbe’t-tasdîki’l-vicâhî vekîl-i mûmâ-ileyh inân-ı kelâmını semt-i vifâkdan cânib-i şikāka atf edip, vakfen akār İmâm-ı A‘zam ve İmâm-ı efhâm Ebû Hanife el-Kûfî -cûziye bi’l-hayri’l-cezâ ve kûfiye- hazretleri mezheb-i hatîrlerinde gayr-ı lâzım olmağla, binâen-aleyh vakf-ı mezbûrdan bi’l-vekâle rücû‘ eyledim. Mütevellî-i mezbûrdan menâzil-i merkūmeyi istirdâd ederse bana teslîm eylesin dedikde, mütevellî-i reşîd cevâb-ı savâba tesaddî edip, eğerçi hâl bast olunan minvâl üzredir, lâkin imâmeyn-i hümâmeyn -rahimehu’llâh- hazretleri katlarında sıhhat [ve] lüzûm tev’emân olup mufârıkan olmayıp müte‘allikası olmağın, redden imtinâ‘ ederim deyu vekîl-i müşârün-ileyh ile husûmet ve nizâ‘ edip, hâkim-i muvakki‘-i kitâb -tûbâ-leh ve hüsnü me’âb- hazretleri huzûr-ı fâ’izü’n-nûrlarında müterâfi‘ân ve her biri mübtegāsınca fasl-ı hasme tâlibân olduklarından hâkim-i müşârün-ileyh lâ zâle müşârün bi’l-beyân-ileyh hazretleri dahi tarafeynin kelâmını ısgā [22a] ve temhîd-i mebânî her vechile hayrı evlâ görüp, alâ kabûli men‘ yerâhü vakf-ı mezbûrun lüzûmana dahi hükm-i sahîh-i mer‘î etmeğin, mezbûr vakf-ı mezkûr sahîh ve lâzım olup, nakz-ı nakīzine mecâl muhâl ve ibtâl ve ta‘tîli adîmü’l-ihtimâl oldu, cerâ zâlike ve hurrire fî evâsıtı Cemâziyelevvel li sene isneteyn ve mi’e ve elf. Min hicreti men-lehü’l-izz ve’ş-şeref. Şuhûdü’l-hâl: Mehmed Efendi, Abdurrahman Efendi b. Mehmed Efendi, İbrahim Çelebi b. Ahmed, Mehmed Efendi b. Sefer Efendi.