Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 323 Hüküm no: 362 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi bt. Bogos’un eşi Bogos v. Aknadiyos’da olan alacağını tahsil etmesi Husûs ile ahz [ü] kabz, ibrâ, 900 guruş Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana Kâtib es-Seyyid Mehmed Rıfat Efendi mahmiye-i İstanbul’da Gedikpaşa kurbünde Kolluk sokağında Terzi Mıgırdıç zimmînin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezkûrda müsteciren mütemekkine ve şahsını Varderes v. Vasil ve Tatos v. Bedros zimmîler ta‘rîfleriyle mu‘arrefe olan Takohi bt. Bogos Nasrâniye meclis-i ma‘kūd-ı mezkûrda hâlâ zevci işbu hâmilü’r-rakīm Bogos v. Aknadiyos zimmî muvâcehesinde ikrâr-ı tam ve takrîr-i kelâm edip benim zevcim mersûm zimmetinde cihet-i deyn-i şer‘îden altı yüz guruş alacak hakkım olup meblağ-ı mezbûru zevcim merkūm bundan akdem bana def‘ ü teslîm, ben dahi yedinden tamamen ahz ü kabz ve umûruma sarfla istihlâk etmemle ol-vechile zevcim mersûm zimmetinde bir akçe ve bir habbe hakkım ve alacağım bâkī kalmamağla husûs-ı mezkûra ve sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan zevcim mersûmun zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 22 B sene [1]242. Şühûdü’l-hâl: Çukadâr Mehmed Ârif Ağa, Muhzır Emin Çelebi, Ağya v. Mıgırdıç, Mıgırdıç v. Serkiz, Artin v. Aknadiyos.