Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 324 Hüküm no: 363 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takohi bt. Bogos’un vasiyeti ve vasiyetini uygulamak üzere vasi tayin etmesi Kefere Vasiyeti Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana Kâtib es-Seyyid Mehmed Rıfat Efendi mahmiye-i İstanbul’da Gedikpaşa kurbünde Kolluk Sokağı’nda Terzi Mıgırdıç zimmînin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezkûrda müsteciren mütemekkine ve şahsın Varderes v. Vasil ve Tatos v. Bedros zimmîler ta‘rîfleriyle mu‘arrefe olan Takohi bt. Bogos Nasrâniye meclis-i ma‘kūd-ı mezkûrda zikri âtî vesâyâsını tenfîze vasîyy-i muhtâr nasb ü ihtiyâr eylediği [62b] işbu hâmilü’r-rakīm Manil v. Aknadiyos zimmî muvâcehesinde ikrâr-ı tam ve takrîr-i kelâm edip ben bi-emrillâhi te‘âlâ hâlike olduğumda nakd-i mevcûdum olan beş yüz guruş ile sâir terekemi ve zimem-i nâsda zuhûr eden hukūkumu mersûm Manil zimmî ahz ü kabz ve kadr-ı kifâye meblağ ile cesedimi hafra ilkā edip düyûn-ı müsbetem zuhûr eder ise ba‘de’l-edâ bâkī kalan terekemin sülüsünü ifrâz ve sülüs-i mezkûrdan altmış guruş ile helâkim günü ta‘âm tabh olunup fukarâ it‘âm oluna ve helâkimden kırk gün mürûrunda elli guruş ile ta‘âm tabh olunup fukarâ it‘âm oluna ve yüz guruş ile seng-i mezar ve ta‘mîr-i mezarıma harc ü sarf oluna ve sülüs-i mezkûrdan fazla kalır ise fazla-i mezkûr vasîm mersûm yediyle vücûh-ı bir ve hayrâta harc ü sarf oluna ve bâkī sülüsân terekemi dahi benim vereseme îsâl ve teslîm eyleye deyü vasiyet ve tenfîzine mersûm Manil zimmîyi vasîyy-i muhtâr nasb ü ta‘yîn eylediğimde, ol dahi ber-vech-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd eyledikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 22 B sene [1]242. Şühûdü’l-hâl: Çukadâr Mehmed Ârif Ağa, Muhzır Emin Çelebi, Ağya v. Mıgırdıç, Mıgırdıç v. Serkiz, Artin v. Afnadiyos.