Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 325 Hüküm no: 364 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Mehmed’in Mehmed Raşid aleyhindeki hizmetkâr ücreti davasında anlaşma sağlanması Ücretden ibrâ, ahz [ü] kabz, 300 guruş Mahmiye-i İstanbul’da Şehremîni kurbünde Deniz Abdal mahallesinde sâkin Mahmud b. Mehmed meclis-i şer‘-i şerîf-i enverde işbu bâ‘isü’l-vesîka es-seyyid Mehmed Râşid b. İsmail mahzarında ikrâr-ı tam ve takrîr-i kelâm edip ben ücret ile hizmet eder makūlesinden olup bundan akdem merkūm es-Seyyid Mehmed Râşid’in talebiyle ücret kavlinsiz târih-i vesîkaya gelince altı sene kendüye hizmet etmemle müddet-i mezkûrede eylediğim hizmetim için müstahık olduğum bin seksen guruş ücret-i mislimi bundan akdem merkūmdan taleb ve da‘vâya tasaddî eylediğimde ol dahi benim müdde‘âmı inkâr ve ol-vechile beynimizde münâza‘ât-ı kesîre cereyân etmiş idi. El-hâletü hâzihî beynimize muslihûn tavassut edip beni ber-minvâl-i muharrer tasaddî eylediğim da‘vâ-yı mezkûremden merkūm es-Seyyid Mehmed Râşid ile bi’t-tav‘ ve’r-rızâ üç yüz guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh-ı mezbûr üç yüz guruşu mezbûr es-Seyyid Mehmed Râşid bana def‘ ü teslîm, ben dahi yedinden tamamen ahz ü kabz edip müddet-i mezkûrede eylediğim hizmetim için ziyâde ecr-i misl mutâlebesinde ve işbu târih-i vesîkaya gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan merkūm es-seyyid Mehmed Râşid’in zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 21 B sene [1]242. Şühûdü’l-hâl: Muhzır Ali Çelebi, Hasan Efendi b. Abdurrahman, Ahmed Efendi b. Mustafa, Muhzır Mehmed Çelebi.