Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 325 Hüküm no: 365 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Osman ile Nefise ve Osman’ın Vidos karyesinde vefat eden Hafize’nin terekesinden hisselerini teslim almaları Mîrâsdan ibrâ Havâss-ı Refî‘a kazâsına tâbi‘ Çekmece-i sagīr nâhiyesine muzâfe Vidos karyesinde sâkine iken bundan akdem fevt olan Hafize bt. Ahmed b. Mehmed’in verâseti zevc-i metrûku Ali b. Mustafa ile vâlidesi Fatıma bt. Osman’a ve li-ebeveyn karındaşları Nefise ve Osman’a münhasıra ve tashîh-i mesele-i mîrâsları otuz altı sehmden olup sihâm-ı mezbûreden dokuz sehmi zevc-i merkūm Ali’ye ve altı sehmi vâlidesi mezbûre Fatıma Hatun’a ve yedi sehmi kız karındaşı mezbûre Nefise’ye ve on dört sehmi er karındaşı merkūm Osman’a inhisârı tahakkukundan sonra zâtları mu‘arrefe mezbûre Fatıma ve Nefise hatunlar meclis-i şer‘-i şerîf-i enverde tereke-i müteveffiye-i mezbûra bi’l-verâse ve bi’l-emâne vaz‘-ı yedi mütehakkık olan işbu bâ‘isü’l-vesîka zevc-i merkūm Ali mahzarında her biri bi’l-verâse ikrâr-ı tam ve takrîr-i kelâm edip mezbûre Fatıma Hatun mûrisemiz müteveffâ-yı mezbûrenin hîn-i vefâtında yanında mevcûde âhara bey‘ olunan terekesi esmânından ba‘de ihrâci’l-mesârifi’l-lâzıme sahhu’l-bâkī üç yüz yetmiş guruşu merkūm Ali bi’l-verâse ve bi’l-emâne kabz etmekle meblağ-ı mezbûrdan ber-tashîh-i mezkûr hisse-i irsiyemize isâbet eden yüz otuz üç guruş yirmi üç parayı mezbûr Ali benimle mezbûre Nefise Hatun’a ve oğlu gāib-i merkūmun ber-tashîh-i mezkûr hisse-i irsiyesine isâbet eden yüz kırk üç guruş otuz dört parayı dahi gāib-i merkūma vermek için bi’l-emâne bana def‘ ü teslîm biz dahi yedinden tamamen ve kâmilen ahz ü kabz etmemizle hukūk-ı mîrâsa ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan her birimiz âharın zimmetini ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 19 B sene [1]242. Şühûdü’l-hâl: Es-Seyyid Abdulkadir b. es-Seyyid Mehmed, es-Seyyid Ahmed Efendi, es-Seyyid Mehmed Sadık b. el-Hâc Mustafa, Muhzır Abdulfettah Çelebi.