Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 326 Hüküm no: 366 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamdancı Seyyid Mehmed Ağa’nın Hafız Halil Efendi’yi vekil tayin etmesi İsbât-ı vekâlet hücceti Vilâyet-i Anadolu’da Uluborlu kazâsı ahâlisinden olup mahmiye-i İstanbul’da Sultan Selim kurbünde sâkin iken bundan akdem kazâ-i mezbûra âzim olan Şamdancı es-Seyyid Mehmed Ağa b. es-Seyyid el-Hâc Mustafa b. es-Seyyid İbrahim tarafından ber-vech-i âtî vekâlet iddi‘â eden işbu bâ‘isü’l-vesîka es-Seyyid Hafız Halil Efendi b. es-Seyyid el-Hâc Ahmed meclis-i şer‘-i şerîf-i enverde Yusuf Ağa b. Selim mahzarında üzerine da‘vâ ve takrîr-i kelâm edip merkūm es-Seyyid Mehmed Ağa’nın merkūm Yusuf Ağa zimmetinde cihet-i karzdan elli guruş alacak hakkı olmağla meblağ-ı mezbûru merkūmdan taleb ve da‘vâ ve ahz ü kabza ve sâlifü’z-zikr Sultan Selim kurbünde Reîsülküttâb Ebûbekir Efendi ve zevcesi Nevruz Hatun Vakıfları’ndan bâ-temessük-i mütevellî bi’l-icâreteyn taht-ı tasarrufunda olan ma‘lûmü’l-hudûd bir bab vakıf menzilini dahi bedel-i misli ve bâ-ma‘rifet-i mütevellî âhara ferâğa ve kabz-ı bedele ve makbûzumu yedimde hıfza ve cemî‘ umûrunu rü’yete merkūm es-Seyyid Mehmed Ağa kazâ-i mezbûra gider iken beni şühûd mahzarlarında vekîl nasb u ta‘yîn eylediğinde ben dahi vekâlet-i mezkûreyi kabûl etmemle meblağ-ı mezbûr elli guruşu merkūm Yusuf Ağa’dan vekâletim hasebiyle taleb ederim, suâl olunsun dedikde, gıbbe’s-suâl merkūm Yusuf Ağa cevâbında merkūm es-Seyyid Mehmed Ağa’ya zimmetinde cihet-i mezbûreden elli guruş deyni olduğunu ikrâr, müdde‘î-i merkūm es-Seyyid Hafız Halil Efendi’nin vekâleti ma‘lûmum değildir deyü inkâr edicek, müdde‘î-i merkūmdan ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden es-Seyyid Mehmed Efendi b. es-Seyyid el-Hâc Mehmed ve es-Seyyid el-Hâc Ali Ağa b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka merkūm es-Seyyid Mehmed Ağa b. es-Seyyid el-Hâc Mustafa b. es-Seyyid İbrahim’in mezbûr Yusuf Ağa zimmetinde cihet-i karzdan elli guruş alacak hakkı olup meblağ-ı mezbûru merkūm Yusuf Ağa’dan taleb ve da‘vâ ve ahz ü kabza ve zikr olunan Sultan Selim kurbünde vâki‘ bâ-temessük-i mütevellî bi’l-icâreteyn taht-ı tasarrufunda olan ma‘lûmü’l-hudûd bir bâb menzilini bedel-i misli ve bâ-ma‘rifet-i mütevellî âhara ferâğa ve kabz-ı bedele ve makbûzunu yedinde hıfza ve cemî‘ umûrunu rü’yete kazâ-i mezbûra gider iken işbu müdde‘î-i merkūm Hafız Halil Efendi’yi tarafından bizim huzûrumuzda vekîl nasb ü ta‘yîn eylediğinde ol dahi vekâlet-i mezkûreyi kabûl eyledi, biz bu husûsa bu vech üzere şâhidleriz ve şehâdet dahi ederiz deyü her birimiz müttefikü’l-lafz ve’l-ma‘nâ edâ-yı şehâdet-i şer‘iye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a [bi’t-taleb ketb olundu.] Fî 20 B sene [1]242. Şühûdü’l-hâl: Muhzır Ebûbekir Çelebi, Muhzır Ali Çelebi, Muhzır Emin Çelebi.