Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 327 Hüküm no: 367 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marta bt. Sekriz’in Takohi bt. Kigork’da olan hizmetkârlık bedelini tahsil etmesi Ücret’den ibrâ, ahz [ü] kabz, 927 guruş 30 para Mahmiye-i İstanbul’da Yenikapı hâricinde Yenimahalle’de mütemekkine tahmînen yirmi iki yaşında sin ve cüssesinin bulûğuna tahammülü ve bulûğunu mukırra ve mu‘terife ve şahsını zeyl-i rakīmde muharrerü’l-esâmî kimesneler ta‘rîfleriyle mu‘arrefe olan Marta bt. Serkiz nâm bikr-i bâliğa meclis-i şer‘-i hatîr-i lâzımü’t-tevkīrde işbu hâmiletü’r-rakīm Takohi bt. Kigork Nasrâniye tarafından husûs-ı âtîde tasdîka vekîl-i şer‘îsi Serkiz v. Serope zimmî muvâcehesinde ikrâr-ı tam ve takrîr-i kelâm edip ben ücret ile hizmet eder makūlesinden olup mersûme Takohi Nasrâniyenin zevci olup bundan akdem hâlik olan Kuyumcu Haçador v. Mıgırdıç zimmînin talebiyle senede iki yüz elli guruş ücret mukābelesiyle üç sene ve ba‘dehû mersûme Takohi Nasrâniyenin talebiyle beher sene ikiyüz guruş ücret tesmiyesiyle üç sene hizmet ve bu esnâda nefsimi bir zimmîye tezvîc birle mersûme Takohi Nasrâniyeden müfârakat etmemle müddeteyn-i mezkûreteynde ücret-i müsemmâ-yı mezkûremden müctemi‘ olan bin üç yüz elli guruş ve bahşiş olmak üzere âhardan ahz ve cem‘ eylediğim yüz guruş ve mersûme Takohi ve zevci hâlik-i mersûm Haçador zimmînin bahşiş olmak üzere bana mallarından teslîm eyledikleri iki yüz elli guruş ki min-haysü’l-mecmû‘ bin altı yüz elli beş guruşun üç yüz yetmiş sekiz guruş on para ile mersûme Takohi Nasrâniye benim emrimle âhardan bâ-defter-i müfredât cihâz iştirâ ve bana teslîm, <> ve üç yüz elli guruş ile kezâlik benim emrimle âhardan bir zümrüd küpe iştirâ ve bana teslîm ve bâkīsi olan dokuz yüz yirmi yedi guruş otuz parayı dahi nakden bana teslîm ben dahi yedinden tamamen ve kâmilen ahz ü kabz edip ol-vechile mersûme Takohi Nasrâniye zimmetinde bir akçe ve bir habbe bâkī kalmamağla müddet-i mezkûrede eylediğimhizmetim için ziyâde ecr-i misl mutâlebesine ve hukūk-ı sâire-i şer‘iyeye müte‘allika âmme-i de‘âvî ve kâffe-i mutâlebâtdan gerek mersûme Takohi Nasrâniyenin ve gerek hâlik-i mersûm Haçador zimmînin terekesini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 23 B sene [1]242. Şühûdü’l-hâl: Muhzır Ali Çelebi, Muhzır Ebûbekir Çelebi, Muhzır Fettah Çelebi, Muhzır Feyzullah Çelebi, Muhzır Mehmed Çelebi.