Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 328 Hüküm no: 368 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zekiye bt. Mustafa’nın eşi Seyyid Mehmed Nuri’den boşanması Tatlîk Mahmiye-i İstanbul’da Şehremîni kurbünde Ereğli mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Zekiye bt. Mustafa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-vesîka es-Seyyid Mehmed Nuri Ağa b. es-Seyyid Hasan mahzarında ikrâr-ı tam ve takrîr-i kelâm edip merkūm es-Seyyid Mehmed Nuri zevc-i dâhilim olup târih-i kitâbdan iki gün mukaddem beni tatlîk etmekle zimmetinde mütekarrir ve ma‘kūdün-aleyh olan yüz yirmi beş guruş mehr-i müeccelim ve nafaka-i iddetim ve meûnet-i süknâm mukābelelerinde beynimizde bi’t-terâzî ta‘yîn olunan altmış guruş ki cem‘an yüz seksen beş guruşu merkūm es-Seyyid Mehmed Nuri bana def‘ ü teslîm, ben dahi yedinden tamamen ahz ü kabz edip ancak hukūk-ı zevciyete müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 21 B sene [1]242. Şühûdü’l-hâl: Ali Efendi b. Mehmed, Muhzır Ebûbekir Çelebi, Muhzır Feyzullah Çelebi, Muhzır İsmail Çelebi, Muhzır Ali Çelebi.