Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 329 Hüküm no: 369 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Safer’in Hüseyin Çavuş’tan borç alması ve aşçı ve hoşafcı dükkânları gediğini rehin vermesi İdâne Hücceti, 2900 guruş Mahmiye-i İstanbul’da Langa Yenikapısı kurbünde Orta sokak kurbünde mütemekkin Aşçı Safer v. Asvador zimmî yine esnâf-ı merkūmeden Agob v. Lusir? ve Haçador v. Kirkor ve Bağdisar v. Kazer zimmîler hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-vesîka Hüseyin Çavuş b. Mehmed mahzarında ikrâr-ı tam ve takrîr-i kelâm edip mahmiye-i mezbûrede Mercan Çarşısı’nda vâki‘ İsayel ve Bedros zimmîler dükkânları beynlerinde kâin bir bâb aşçı ve hoşâbcı dükkânı derûnunda mevcûde beyne’l-esnâf gedik ta‘bîr olunur âltı kazgan ve iki güğüm ve dört tencere ve altı karavana ve iki bâdiye ve sâir âlât-ı lâzıme-i ma‘lûmenin nısflarını merkūm Hüseyin Çavuş’un zikri âtî bana idâne edeceği iki bin guruş mukābelesinde rehin vaz‘ ü teslîm eylediğimde ol dahi ber-vech-i muharrer irtihân ve kabz ü kabûl eylediğinden sonra merkūm Hüseyin Çavuş bana malından iki bin guruş idâne ve teslîm ben dahi yedinden istidâne ve kabz etmemle meblağ-ı mezbûr ile semeni târih-i kitâbdan üç sene tamamına değin yine mezbûrun malından ve yedinden iştirâ ve kabz eylediğim bir hilâlî sâ‘at semeninden dokuz yüz guruş ki ciheteyn-i mezkûreteynden cem‘an iki bin dokuz yüz guruş merkūm Hüseyin Çavuş’a zimmetimde vâcibü’l-edâ ve lâzımü’l-kazâ sahîhan deynim olmağla merkūm Hüseyin Çavuş âlât-ı muharrere-i mezkûreyi li-ecli’l-isti‘mâl bana i‘âre ve teslîm, ben dahi yedinden isti‘âre ve kabz etmemle âlât-ı muharrere-i mezkûre yedimde âriyettir deyip ve hâzırûn-ı merkūmûn dahi mukırr-ı mezbûrun deyni olan meblağ-ı mecmû‘-ı mezbûr iki bin dokuz yüz guruşa mersûm Safer zimmînin emriyle biz dahi kefîl ve zâmin olduk dediklerinde mâ-vaka‘a [bi’t-taleb ketb olundu.] Fî 24 B sene [1]242. Şühûdü’l-hâl: Kethudâ Hüseyin b. Ahmed, Muhzır Ali Çelebi, Yazıcı Mehmed Efendi, Mütevellî Emin Ağa, Yiğitbaşı Ali Usta, es-Seyyid Ahmed Usta, Hüseyin Usta, Muhzır Ebûbekir Çelebi.