Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 330 Hüküm no: 370 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zekiye bt. Mustafa’nın velayetinde olan küçük oğlu Seyyid Hasan için babası Seyyid Mehmed Nuri üzerine nafaka takdir olunması Sagīr Nafakası 25 guruş Mahmiye-i İstanbul’da Şehremîni kurbünde Ereğli mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe işbu bâ‘isetü’l-vesîka Zekiye bt. Mustafa nâm hatun meclis-i şer‘-i şerîf-i enverde zevc-i sâbıkı es-Seyyid Mehmed Nuri b. es-Seyyid Hasan mahzarında ikrâr-ı tam ve <> ta‘bîr ani’l-merâm edip merkūm es-Seyyid Mehmed Nuri ile zevciyet beynimizde kāime iken merkūmun firâşından hâsıl ve benden mütevellid ve bi-hakkı’l-hıdâne hacr ve terbiyemde olan tahmînen üç yaşında sulbî oğlu es-Seyyid Hasan nâm sagīrin aslâ malı olmayıp ol-vechile nafakaya muhtâc olmağla sagīr-i merkūmun nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve-bahâsı için babası merkūm üzerine bi’t-terâzî târih-i kitâbdan beher şehr yirmi beşer guruş farz ve takdîr buyurup meblağ-ı mefrûz-ı mezkûru sagīr-i merkūmun nafaka ve kisve ve levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Zekiye Hatun’a izin vermeğin mâ-vaka‘a [bi’t-taleb ketb olundu.] Fî 21 B sene [1]242. Şühûdü’l-hâl: Ali Efendi b. Mehmed, Muhzır Ebûbekir Çelebi, Muhzır Feyzullah Çelebi, Muhzır Mehmed Çelebi, Muhzır İsmail Çelebi, Muhzır Ali Çelebi.