Bab Mahkemesi 54 Numaralı Sicil (H. 1102 / M. 1691) cilt: 20, sayfa: 144 Hüküm no: 135 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Veli b. Abbas’ın kendisinden haksız yere para olan Kadı Abdülbâki Çelebi b. Mehmed ile sulh olması Medîne-i Tokat ahâlîsinden el-Hâc Veli b. Abbas nâm kimesne meclis-i şer‘-i şerîfde, bâ‘isü hâze’l-kitâb es-Seyyid Rahmetullah Efendi b. Mehmed nâm kimesne tarafından husûs-ı âti’l-beyâna vekîl olduğu Mustafa Efendi b. Mehmed ve İbrahim b. Hüseyin şehâdetleriyle sâbit olan Abdülbâki Çelebi b. Mehmed mahzarında ikrâr ve takrîr-i kelâm edip, bundan akdem mezbûr es-Seyyid Rahmetullah Efendi Manisa’da sâbit nâib iken ( ) nâm zimmetinde hakkım olmağla, mûmâ-ileyhi müvellâ eylediğimde da‘vâ-yı mezkûreyi istimâ‘ için benden bi gayri hakkın yüz yirmi guruş ve ücret nâmına yüz beş guruşu ahz u kabz etmekle, ber vech-i muharrer cem‘an iki yüz yirmi beş guruşu müvekkil-i müşârün-ileyhden da‘vâ ve taleb eylediğimde, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremdan doksan guruş üzerine beynimizde inşâ-i akd ve sulh eylediklerinde, ben dahi sulh-ı mezbûru kabûl ve bedel-i sulh olan doksan guruşu bi’t-tamâm müvekkil-i müşârün-ileyhden ahz u kabz ettiğimden sonra husûs-ı mezbûra müte‘allik cemî‘ da‘vâdan müvekkil-i müşârün-ileyhin ve sâîr etbâ‘ının zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Tahrîren fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Mahmud Beşe b. İvaz, Yahya Çelebi b. Ahmed, Diğer Yahya Çelebi b. Ahmed, el-Hâc Mustafa Ağa b. Davud, el-Hâc Abdullah b. Mehmed.