Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 330 Hüküm no: 371 Orijinal metin no: [63a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazer v. Bedros’un menzil ve müştemilatını kardeşine satması Menzil mübâya‘ası, 300 guruş Vilâyet-i Anadolu’da medîne-i Erzurum mahallâtından Eminbey mahallesi re‘âyâsından olup mahmiye-i İstanbul’da Irgatpazarı’nda Çadırcı Hanı’nda mütemekkin Kazer v. Bedros zimmî meclis-i şer‘-i hatîr-i lâzımü’t-tevkīrde karındaşı işbu hâmilü’r-rakīm Kalost veledeyi’l-mersûm Bedros zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen mülk ve hakkım olup zikr olunan Eminbey mahallesinde vâki‘ bir tarafdan Urlu Abdullah menzili ve bir tarafdan Sarrâc Parsih zimmî menzili ve bir tarafdan Köylü menzili ve bir tarafdan tarîk-i âm ile mahdûd bir bâb mülk menzil ve karşısında vâki‘ on beş kadem karlığımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Kalost zimmîye üç yüz guruşa bey‘ ü temlik ve mahâllinde zabta tarafımdan mersûmu [63b] taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr üç yüz guruşu karındaşım müşteri-yi mersûm bana def‘ ü teslîm ben dahi yedinden tamamen ve kâmilen ahz ü kabz eyledim, fîmâ-ba‘d menzil-i mahdûd-ı mezkûr ve sâlifü’l-beyân karlık karındaşım mersûmun mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 22 B sene [1]242. Şühûdü’l-hâl: Muhzır Emin b. Süleyman, Muhzır Emin Çelebi, Muhzır Mehmed Çelebi, Çizmeci Kokas, Kürkçü Kazer, Büzmeci Serkiz, Büzmeci Karabez, Büzmeci Mardıros.