Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 331 Hüküm no: 372 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Van ahalisinden Marat v. Markar’ın menzilini satması 736 guruş menzil Vilâyet-i Anadolu’da Van kasabasında Acem Hanı mahallesi re‘âyâsından olup mahmiye-i İstanbul’da, Kantarcılar kurbünde mütemekkin Marat v. Markar zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Markar v. Mardıros zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup zikr olunan Acem Hanı verâsında vâki‘ bir tarafdan Cacıkoğlu menzili ve bir tarafdan Vartan zimmî menzili ve bir tarafdan Kirkor zimmî menzili ve bir tarafdan tarîk-i âm ile mahdûd fevkānî ve tahtânî beş oda ve iki havlu ve bir sokak kapısını müştemil mülk menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Markar zimmîye yedi yüz otuz altı guruşa bey‘ ü temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yedi yüz otuz altı guruşu müşteri-yi mersûm bana def‘ ü teslîm, ben dahi yedinden tamamen ve kâmilen ahz ü kabz eyledim, fîmâ-ba‘d menzil-i mahdûd-ı mezkûr mersûm Markar zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ ve iskāt ve tarafeynden her birimiz ber-vech-i muharrer aharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 B sene [1]242. Şühûdü’l-hâl: Muhzır Emin Çelebi, Muhzır Fettah Çelebi, Muhzır Ali Çelebi. Kigork v. Abraham, Mıgırdıç, Berber Melkon, Marat.