Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 332 Hüküm no: 373 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gaspar v. Sinan’ın Tülbentçi dükkânı gediğini satması 300 guruş, mübâya‘a-i dülbentçi Medîne-i Üsküdar’da Bağlarbaşı nâm mahâlde Yenimahalle’de mütemekkin Gaspar v. Sinan zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Dülbentçi Karabet v. Meldon zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Bezzâzistân-ı atik kurbünde Tekyeciler sûku başında Dülbentci Canik zimmî ile benim âhar dülbentçi dükkânım beynlerinde kâin bir bâb dülbentçi dükkânı derûnunda mevcûde beyne’l-esnâf gedik ta‘bîr olunur bir minder ve bir endâze ve bir akçe tahtası ve bir vezne ve sâir âlât-ı lâzıme-i ma‘lûme üç sehm i‘tibârıyla bir sehmi benim ve iki sehmi müşteri-yi mersûm Karabet zimmînin yedimizde emvâlimiz olmağla ben âlât-ı muharrere-i mezkûrede ber-i‘tibâr-ı mezkûr mâlik olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müşterekim mersûm Karabet zimmîye üç yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı muharrere-i mezkûrenin mecmû‘u mersûm Karabet zimmînin emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer aharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 26 B sene [1]242. Şühûdü’l-hâl: Muhzır Ali Çelebi, Muhzır Abdulfettah Çelebi, Muhzır Emin Çelebi. Simon v. Manuk, Bogos v. Bedros, Eci Melkon v. Kirkor, Aci Gaspar v. Kirkor.