Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 332 Hüküm no: 374 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in velayetinde bulunan küçük oğlu Mehmed’i kayınvalidesi Cemile Hatun’a teslim etmesi İnfâka ta‘ahhüd Mahmiye-i İstanbul’da Yusuf Paşa Çeşmesi kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i şerîf-i enverde kayınvâlidesi kezâlik zâtı mu‘arrefe işbu bâ‘isetü’l-vesîka Cemile bt. Ahmed nâm hatun mahzarında ikrâr-ı tam ve takrîr-i kelâm edip mezbûre Cemile Hatun’un oğlu olup gāib ani’l-meclis Ahmed b. Ali nâm kimesnenin firâşından hâsıl ve benden mütevellid ve bi-hakkı’l-hıdâne hacr ve terbiyemde olan tahmînen üç yaşında oğlum Mehmed’in nafaka ve kisve-bahâsı için babası merkūm üzerine on beş guruş farz ve takdîr olunup el-yevm sagīr-i mezbûr benim terbiyemde olmağla lâkin ben sagīr-i mezbûru kayınvâlidem mezbûre Cemile Hatun’a teslîm eylediğimde ol dahi sagīr-i mezbûru ahz ve bilâ-nafaka sagīr-i mezbûru infâka ta‘ahhüd eyledi dedikde mezbûre Cemile Hatun tasdîk etmeğin mâ-vaka‘a [bi’t-taleb ketb olundu.] Fî-gurre-i Ş sene [1]242 Şühûdü’l-hâl: Muhzır Ali Çelebi, Muhzır İsmail Çelebi, Muhzır Fettah Çelebi.