Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 333 Hüküm no: 375 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın, Mustafa Efendi’ye hizmetkâr verilmesi Hâkim îcârı Mahmiye-i İstanbul’da Topkapı mahallesinde sâkin Mustafa Efendi b. İbrahim tarafından vekîl-i müseccel-i şer‘îsi Mehmed Şakir Efendi b. Abdullah meclis-i şer‘-i şerîf-i enverde bi’l-vekâle takrîr-i kelâm ve ta‘bîr ani’l-merâm edip İnegöl kazâsı ahâlisinden olup müvekkil-i merkūmun yedinde olan tahmînen dokuz yaşında Mehmed b. Hasan nâm sagīrin malı ve zâhirde menfak-ı şer‘îsi ve hâkimü’ş-şer‘den gayrı velîsi olmamağla sagīr-i mezbûr kıbel-i şer‘den beher mâh on guruş îcâr tesmiyesiyle îcâr ve ücret-i mezkûresinin üçer guruşunu vakt-i rüşdüne değin yedinde hıfza ve yedi guruşunu sagīr-i mezbûrun nafaka ve kisvesine harc ü sarfa emir olunmak müvekkilim mezbûrun matlûbudur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûru müvekkil-i merkūm Mustafa Efendi’ye beher mâh on guruş îcâr tesmiyesiyle bi’l-emâne îcâr ve ücret-i mezkûrenin üçer guruşunu sagīr-i mezbûrun vakt-i rüşdüne değin sagīr-i mezbûr için yedinde hıfza ve yedi guruşunu sagīr-i mezbûrun nafaka ve kisve ve sâir levâzım-ı zarûriyesine harc ü sarfa müvekkil-i merkūma izâfetle vekîl-i mezbûra emir etmeğin mâ-vaka‘a [bi’t-taleb ketb olundu.] Fî 2 Ş sene [1]242. Şühûdü’l-hâl: Muhzırbaşı el-Hâc İsmail Ağa, Muhzır Mehmed Çelebi, Muhzır Ali Çelebi, Osman Ağa, Muhzır Emin Çelebi.