Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 333 Hüküm no: 376 Orijinal metin no: [63b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı Serkiz’in Erzincan’da Hocabey mahallesindeki menzil hissesini kız kardeşi Takohi’ye satması 100 guruş mübâya‘a-i menzil, hisse Vilâyet-i Anadolu’da Erzincan kasabasında Hocabey mahallesi re‘âyâsından olup medîne-i Üsküdar’da Yenimahalle’de mütemekkin Sandalcı Serkiz v. Kalost zimmî meclis-i şer‘-i şerîf-i enverde li-ebeveyn kız karındaşı işbu hâmiletü’r-rakīm Takohi bt. el-mersûm Kalost Nasrâniyenin zevci ve tarafından husûs-ı âti’l-beyânda tasdîka vekîl-i şer‘îsi Bogos v. Varos zimmî muvâcehesinde ikrâr-ı tam ve takrîr-i kelâm edip zikr olunan Erzincan kasabasında mahalle-i mezbûrede vâki‘ bir tarafdan Lazari zimmî menzili ve bir tarafdan Sahuk zimmî menzili ve bir tarafdan Tuzlu zimmî menzili ve bir tarafdan tarîk-i âm ile mahdûd bağ ta‘bîr olunur beş oda ve bir mikdâr havluyu müştemil bir bâb mülk menzil beş sehm i‘tibârıyla iki sehmi benim ve iki sehmi mühtedî Abdullah’ın ve bir sehmi kız karındaşım mersûme [64a] Takohi Nasrâniyenin yedimizde iştirâken ve şâyi‘an mülk ve hakkımız olmağla ben menzil-i mahdûd-ı mezkûrda ber-i‘tibâr-ı mezkûr mâlik olduğum iki sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile kız karındaşım mersûmeye yüz guruşa bey‘ ü temlik ve mahâllinde zabta tarafımdan mersûmeyi taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yüz guruşu kız karındaşım mersûme bana def‘ ü teslîm ben dahi yedinden tamamen ahz ü kabz eyledim, fîmâ-ba‘d menzil-i mahdûd-ı mezkûrun üç sehmi kız karındaşım mersûmenin mülk-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan kız karındaşım mersûmenin zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 22 B sene [1]242. Şühûdü’l-hâl: Muhzır Mehmed Çelebi, Muhzır Emin Çelebi. Sahak, Haçador, Artin, Kazer.