Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 334 Hüküm no: 377 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meyan bt. Abraham’ın Çömlekçi dükkânı gediği hissesini satması Nısf çömlekçi, 1000 guruş Mahmiye-i İstanbul’da Karagümrük kurbünde Ermeni odalarında mütemekkine ve şahsı zeyl-i rakīmde muharrerü’l-esâmî kimesneler ta‘rîfleriyle mu‘arrefe Meyan bt. Abraham nâm Nasrâniye meclis-i şer‘-i hatîr-i lâzımü’t-tevkīrde işbu bâ‘isü’l-vesîka Çömlekçi İsmail b. Ali mahzarında ikrâr-ı tam ve takrîr-i kelâm edip mahmiye-i mezbûrede Sultan Bâyezid Câmi‘-i şerîfi havlusunda vâki‘ medrese ittisâlinde kâin bir bab çömlekçi dükkânı derûnunda mevcûde beyne’l-esnâf gedik ta‘bîr olunur bir çekmece ve bir akçe tahtası ve bir minder ve sâir âlât-ı lâzıme-i ma‘lûmenin nısfları benim ve nısf-ı âharları mezbûre İsmail’in yedimizde iştirâken ve şâyi‘an emvâlimiz olmağla ben sâlifü’z-zikr âlât-ı muharrere-i lâzıme-i ma‘lûmede mâlike olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm İsmail’e bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu müşteri-yi merkūm bana [def‘] ve teslîm, ben dahi yedinden tamamen ahz ü kabz eyledim, fîmâ-ba‘d âlât-ı lâzıme-i muharrere-i mezkûrenin mecmû‘u merkūm İsmail’in emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 23 B sene [1]242. Şühûdü’l-hâl: Kethudâ el-Hâc Hüseyin Ağa, Hasan Ağa, Ali Ağa, Ahmed Ağa, Yiğitbaşı Şeyh Yakub Efendi.