Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 335 Hüküm no: 378 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in hizmetkârlık bedelinden alacağını tahsil etmesi Ücretden ibrâ, Mahmiye-i İstanbul’da Latif Paşa mahallesinde sâkine Hadice Hanım bt. Ali’nin menzilinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ümmügülsüm bt. Mehmed nâm hatun meclis-i şer‘-i şerîf-i enverde kezâlik zâtımu‘arrefe işbu bâ‘isetü’l-vesîka mezbûre Hadice Hanım mahzarında ikrâr-ı tam ve takrîr-i kelâm edip ben ücret ile hizmet eder makūlesinden olup mezbûre Hadice Hanım’ın talebiyle menzilinde işbu târih-i vesîkaya gelince ücret kavlinsiz yedi sene hizmet ve bu esnâda mufârakat murâd etmemle müddet-i mezkûrede mezbûre Hadice Hanım beni malından infâk ve iksâ eylediğinden mâ‘adâ müddet-i mezkûrede eylediğim hizmetim için müstahıkka olduğum ecr-i mislim mukābelesinde mezbûre Hadice Hanım bana malından sekiz kat câmeşûy ve sekiz makreme ve bir çift etrâfı elmaslı zümrüd küpe ve sekiz entari ve sekiz şalvar ve bir semmûr kürk ve bir nâfe kürk ve iki hırka ve bir ferâce ve dört havlu ve beş boğça ve dört minder ve üçihrâm mak‘ad ve beş çift çatma yasdık ve bir orta keçesi ve bir döşek ve bir şilte ve iki yorgan ve bir baş yasdığı ve bir yüz yasdığı ve bir seccâde ve bir kapı perdesi ve beş sahan ve iki tencere ve bir tâbe ve bir tas ve bir leğen ma‘a ibrik ve bir hamam tası ve bir kadayıf sinisi ve bir ta‘âm sinisi ve bir âbdest leğeni ve bir lenger ve bir güğüm ve beş fincan ma‘a zarf ve bir iskemle ve üç şamdan ve sekiz tabak ve bir mangalını bana def‘ ü teslîm ben dahi yedinden tamamen ahz ü kabz edip mezkûrede eylediğim hizmetim için ziyâde ecr-i misl mutâlebesine ve bi’l-cümle husûs-ı mezkûra ve sâire müte‘allika âmme-i de‘âvî ve kâffe-i mutâlebâtdan mezbûre Hadice Hanım’ın zimmetini kabûlünü hâvî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî-gurre-i Ş sene [1]242. Şühûdü’l-hâl: el-Hâc Ali b. Mehmed, İbrahim Ağa b. Mehmed, Muhzır Ali Çelebi, Muhzır İsmail Çelebi.