Bab Mahkemesi 54 Numaralı Sicil (H. 1102 / M. 1691) cilt: 20, sayfa: 144 Hüküm no: 136 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Ağa b. Mehmed Vakfı’na mütevelli tayin edilmesi Merhûm Pîr Mehmed Ağa b. Mehmed nâm sâhibü’l-hayrın Mahmiye-i İstanbul’da Hayreddin Bey mahallesinde hayyâtîn-i hâssa kârhânesinde vâki‘ mescid-i şerîf mühimmâtına vakf olan altmış guruşun mütevellîsi olmamağla, bir mütevellî nasb olunmak ehem ve elzem ve işbu bâ‘isü’l-kitâb Hasan Ağa b. Ahmed nâm kimesne tevliyete ehil ve müstahık olmağın, vakf-ı mezbûra yevmî nîm akçe ile kıbel-i şer‘-i şerîfden mütevellî nasb ve ta‘yîn olundukda, ol dahi tevliyet-i mezkûreyi kabûl ve merâsimini edâya ta‘ahhüd ve iltizâm etmeğin, mâ vaka‘a bi’t-taleb ketb olundu. Fî gurreti Cumâdelâhire [li sene] isneteyn ve mi’e ve elf. Şuhûdü’l-hâl: Ahmed Ağa b. Ali ser-hayyâtîn-i hâssa, Osman Efendi b. Hasan imâm-ı mescid-i mezkûr, Osman b. Abdullah kethüdâ-yı hayyâtîn-i hâssa, Ahmed b. Hasan ser-bölük-i hâssa ve İbrahim Çelebi b. Ahmed.