Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 341 Hüküm no: 386 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hacı Mustafa’nın Halıcılar Hanı’ndaki Kuyumcu dükkânı gediği hissesini satması Kuyumcu Gediği, 500 guruş Mahmiye-i İstanbul’da Mevlevîhâne kapısı dâhilinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emine bt. el-Hâc Mustafa nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-vesîka Âişe bt. Hüseyin nâm hatun mahzarında ikrâr-ı tam ve takrîr-i kelâm edip mahmiye-i mezbûrede Halıcılar Hanı fevkānîsinde Kürkçü Sarrâfoğlu odası ittisâlinde kâin bir bâb kuyumcu odası derûnunda mevcûde beyne’l-esnâf gedik ta‘bîr olunur, bâ-defter-i müfredât âlât-ı lâzıme-i ma‘lûme dört sehm i‘tibârıyla bir sehmi benim ve üç sehmi mezbûre Âişe Hatun’un yedimizde emvâlimiz olmağla ben âlât-ı lâzıme-i ma‘lûme-i mezkûrede ber-i‘tibâr-ı mezkûr mâlik olduğum bir sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müşterikem mezbûre Âişe Hatun’a beş yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruşu müşteriye-i mezbûre bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d âlât-ı lâzıme-i ma‘lûmenin mecmû‘u mezbûre Âişe Hatun’un emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ş sene [1]242. Şühûdü’l-hâl: Ali Çelebi el-muhzır, İbrahim Çelebi el-muhzır, Muhzır Mehmed Çelebi, Muhzır Feyzullah Çelebi.