Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 342 Hüküm no: 387 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Mahbube’nin küçük kızı Zeliha için babası tarafından nafaka tahsis olunması Sagīr Nafakası, 22 guruş Mahmiye-i İstanbul’da Eğrikapı kurbünde Yatağan Çeşmesi nâm mahâlde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zenciye Mahbube bt. Abdullah nâm ümm-i veled mu‘takası meclis-i şer‘-i şerîf-i enverde es-Seyyid Abdüllatif Ağa b. es-Seyyid Hasan mahzarında ikrâr-ı tam ve takrîr-i kelâm edip merkūm es-Seyyid Abdüllatif Ağa’nın firâşından hâsıla ve benden mütevellide ve bi-hakkı’l-hıdâne hacr ve terbiyemde olan tahmînen yedi aylık sulbiye kızı Zeliha nâm sagīrenin malı olmayıp ol-vechile nafakaya eşedd-i ihtiyâc ile muhtâce olmağla sagīre-i mezbûrenin nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve-bahâsı için babası merkūm üzerine târih-i vesîkadan beher mâh yirmi ikişer guruş farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Zenciye Mahbube Hatun’a izin vermeğin mâ-vaka‘a [bi’t-taleb ketb olundu.] Fî 3 Ş sene [1]242 Şühûdü’l-hâl: İvaz Ali Ağa, Muhzır İsmail Çelebi, Muhzır Emin Çelebi.