Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 342 Hüküm no: 388 Orijinal metin no: [65a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’nın bazı ev eşyalarını eşine satması Husûs ile eşyâ mübâya‘ası, nefy, 300 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan kâtib es-Seyyid İbrahim Edhem Efendi mahmiye-i İstanbul’da Ayasofya-i kebîr kurbünde Acemağa mahallesinde vâki‘ Zeyneb Sultan Câmi‘-i Şerîfi müezzini Aydınlı el-Hâc Hüseyin Efendi b. İsmail menziline varıp zeyl-i vesîkada fahrü’l-ümerâi’l-Müslimîn huzûrlarında akd-i meclis-i şer‘-i âlî ettikde merkūm el-Hâc Hüseyin Efendi’nin zevcesi olup zâtı Müslimûn-ı merkūmûn ta‘rîfleriyle mu‘arrefe olan Hadice bt. Mustafa nâm hatun meclis-i ma‘kūd-ı mezkûrda işbu bâ‘isü’l-vesîka merkūm el-Hâc Hüseyin Efendi mahzarında ikrâr-ı tam ve takrîr-i kelâm edip eşyâ-yı memlûkemden iki minder ve beş köhne beledî yasdık ve iki köhne mak‘ad ve bir köhne orta keçesi ve bir ferâce ve bir entari ve bir şalvar ve bir fes ve iki yemeni ve iki tencere ma‘a kapak ve beş sahan ma‘a kapak ve bir tepsi ve bir leğen ma‘a ibrik ve bir mangal ve bir maşraba ve üç güğüm ve bir kazgan ve bir âbdest leğenimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim merkūm el-Hâc Hüseyin Efendi’ye üç yüz guruşa bey‘ ü temlik ve yine yedimde emvâlim olan bir sâ‘at ve iki elmas yüzüğümü dahi zevcim merkūma hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruşu zevcim müşteri-yi merkūm [65b] bana def‘ ü teslîm ben dahi yedinden tamamen ve kâmilen ahz ü kabz ve umûruma sarfla istihlâk eyledim, fîmâ-ba‘d eşyâ-yı muharrere-i mezkûre zevcim merkūm el-Hâc Hüseyin Efendi’nin emvâl-i müşterâsı ve zikr olunan sâ‘at ile yüzükler dahi emvâl-i mevhûbesi ve hakk-ı sırfı olup benim kat‘a alâka ve medhalim kalmadığından mâ‘adâ işbu akd-i meclis olunan menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u zevcim merkūmun malı olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’t-tasdîki’ş-şer‘î vâki‘ hâli kâtib-i merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 2 Ş sene [1]242. Şühûdü’l-hâl: Es-Seyyid el-Hâc Mehmed Ağa b. Ömer, es-Seyyid Ali Efendi b. Hüseyin, Ayasofya-i kebîr İmâm-ı evveli es-Seyyid Hüseyin Efendi b. Hasan, Mehmed Ârif Ağa, Muhzır Ali Çelebi.