Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 343 Hüküm no: 389 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Halo’nun Van’daki arsasını satması 50 guruş, mübâya‘a-i arsa Vilâyet-i Anadolu’da Van kazâsına tâbi‘ Hankök karyesi re‘âyâsından olup Havâss-ı refî‘a kazâsına muzâfe Hasköy’de mütemekkin Asvador v. Halo zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Kaplan v. Kazer zimmî muvâcehesinde ikrâr-ı tam ve takrîr-i telâm edip müstakıllen yedimde mülk ve hakkım olup karye-i mezbûrede vâki‘ ma‘lûmü’l-hudûd bir bâb mülk menzil arsamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Kaplan zimmîye elli guruşa bey‘ ü temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikdensonra semeni olan meblağ-ı mezbûr elli guruşu müşteri-yi mersûm bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d arsa-i mahdûd-ı mezkûr mersûm Kaplan zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûm Kaplan zimmînin zimmetini kabûlü hâvî ibrâ ve iskāt eyledikde, ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ş sene [1]242. Şühûdü’l-hâl: Muhzır Fettah Çelebi, Muhzır Emin Çelebi, Vartan v. Markar, Kigork v. Artin.