Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 344 Hüküm no: 390 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in bazı ev eşyalarını kızına satması 500 guruş, eşyâ mübâya‘ası, husûs ile nefy Husûs-ı âti’l-beyânın mahâllinde ketb ü tahrîri için savb-ı şer‘-i enverden Boluvîzâde müderrisîn-i kirâmdan Mevlana es-Seyyid Esad Efendi mahmiye-i İstanbul’da Zeyrek kurbünde Hacı Hasan mahallesinde Yalnız Bakkāl nâm mahâlde vâki‘ Âişe bt. Mehmed b. Abdurrahman nâm hatunun menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezbûrda sâkine ve zâtı Müslimûn-ı merkūmûn ta‘rîfleriyle mu‘arrefe mezbûre Âişe Hatun meclis-i ma‘kūd-ı mezkûrda sadriye kebîre kızı işbu bâ‘isetü’l-vesîka Saide bt. Yusuf nâm hatunun zevci ve tarafından husûs-ı âti’l-beyânda tasdîka vekîl-i şer‘îsi Ahmed Ağa b. Ali mahzarında ikrâr-ı tam ve takrîr-i kelâm edip eşyâ-yı memlûkemden üç minder ve sekiz çatma yasdık ve üç çuka mak‘ad ve beş yorgan ma‘a çârşeb ve bir döşek ve bir şilte ve bir çârşeb ve bir baş yasdığı ve dört entari ve üç şalvar ve bir ferâcemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile kızım mezbûre Saide Hatun’a beşyüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr beş yüz guruşu kızım mezbûre Saide Hatun bana def‘ ü teslîm ben dahi yedinden tamamen ahz ü kabz eyledim, fîmâ-ba‘d eşyâ-yı muharrere-i mezkûre kızım mezbûrenin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan kızım mezbûrenin zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eylediğinden mâ‘adâ akd-i meclis olunan işbu menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u kızım mezbûrenin malı olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 5 Ş sene [1]242. Şühûdü’l-hâl: Eşrâf-ı kuzâtdan el-Hâc Yakub Efendi, Abdurrahman Efendi, es-Seyyid Hasan Efendi, İmâm Mustafa Efendi, Abdülgani Efendi, Ali Efendi, Muhzır İsmail Çelebi.