Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 345 Hüküm no: 391 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin b. Mehmed’in vârisi Süleyman’ın terekeyi Aziz Mahmud’dan tahsil etmesi Ahz [ü] kabz, ibrâ, 164 guruş Vilâyet-i Rumeli’nde mahrûse-i Selanik’de misâfiren sâkin iken bundan akdem vefât eden Hüseyin b. Mehmed’in li-ebeveyn er karındaşı ve hasran vârisi olduğu lede’ş-şer‘i’l-enver zâhir olan Süleyman meclis-i şer‘-i şerîf-i enverde tereke-i müteveffâ-yı merkūma bi’l-emâne vaz‘-ı yedi mütehakkık olan bâ‘isü’l-vesîka Aziz Mahmud b. Süleyman mahzarında ikrâr-ı tam ve takrîr-i kelâm edip mûrisim karındaşım müteveffâ-yı mezbûrun hîn-i vefâtında yanında mevcûde bi’l-cümle nakid ve tereke-i mebî‘ası esmânından ba‘de ihrâci’l-mesârifi’l-lâzıme sahhu’l-bâkī bâ-defter-i kassâm yüz altmış dört guruş on parayı mezbûr Aziz Mahmud bi’l-emâne kabz [ve] vaz‘-ı yed etmekle meblağ-ı mezbûr yüz altmış dört guruşu mezbûr Aziz Mahmud bana def‘ ü teslîm ben dahi yedinden tamamen ahz ü kabz edip min-ba‘d meblağ-ı mezbûrdan mezbûr Aziz Mahmud zimmetinde bir akçe ve bir habbe bâkī kalmamağla husûs-ı mezkûra ve sâire müte‘allika âmme-i da‘vâdan merkūm Aziz Mahmud’un zimmetini bi’l-verâse ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 5 Ş sene [1]242. Şühûdü’l-hâl: Şaban b. ( ), Küçük Mustafa, Bekçi Mehmed Tâhir, Muhzır Ali Çelebi.