Bab Mahkemesi 54 Numaralı Sicil (H. 1102 / M. 1691) cilt: 20, sayfa: 145 Hüküm no: 138 Orijinal metin no: [22a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa Ağa’nın kardeşi Râbia Hatun’a müşterek sahibi oldukları eşya ve bahçeyi satması Dârü’l-hilâfeti’l-aliyye Kostantıniyye el-mahmiye’de Kovacı Dede mahallesinde sâkine fahrü’l-muhadderât Fâtıma bt. Mustafa Ağa nâm hâtun ba‘de’t-ta‘rîfi’l-mu‘teber meclis-i şer‘-i şerîf-i enverde ve mahfil-i dîn-i münîf-i ezherde, li ebeveyn karındaşı olan bâ‘isetü hâze’l-kitâb zahrü’l-muvakkarât Râbia Hâtun tarafından husûs-ı âti’l-beyânı tasdîka vekîl-i müsecceli olan fahrü’l-akrân Ahmed Ağa b. Mehmed nâm kimesne mahzarında ikrâr ve takrîr-i kelâm edip, mahmiye-i mezbûrede Mirahor mahallesinde Bucakbağı nâm mevzi‘de vâki‘ bir tarafdan Kapı Ağası Halil Ağa bostanı ve bir tarafdan civâr-ı hısn ve bir tarafdan Ömer Çavuş ve Mustafa Bey mülkleri ve bir tarafdan tarîk-i hâs ile mahdûd üç bâb fevkānî oda ve iki bâb tahtânî oda ve selâmlık ve havz ve bi’r-i mâ ve dolap ve kapı ve eşcâr-ı müsmire ve gayr-ı müsmireyi müştemil olup mezbûre Râbia Hâtun ile ale’l-iştirâki’s-seviy mülk-i mevrûsumuz olan eşyânın benim hissem olan nısf-ı şâyi‘ini hemşîrem mezbûre Râbia Hâtun tarafından îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin guruşa bey‘ ve teslîm, ol dahi ber vech-i muharrer iştirâ ve tesellüm edip ve mahmiye-i mezbûrede Aksaray kurbunda Kovacı mahallesinde vâki‘ bir tarafdan Medîne-i münevvere Vakfı ve bir tarafdan Mehmed Çelebi mülkü ve bir tarafdan Mehmed Ağa mülkü ve bir tarafdan tarîk-i âm ile mahdûd tûlen ve arzan bi hesâb-ı terbî‘î sekiz yüz altmış sekiz zirâ‘ arsayı ve eşcâr-ı müsmireyi hâvî bahçeyi ale’l-iştirâki’s-seviy [22b] merkûme Râbia Hâtun ile mülk-i mûrisimiz olmağla, zikr olunan bahçeden dahi nısıf hisse-i şâyi‘amı mûmâ-ileyha Râbia Hâtun’a kezâlik tarafeynden îcâb ve kabûlü hâvî bey‘-i kat‘î ile beş yüz guruşa bey‘ ve teslîm, ol dahi iştirâ ve tesellüm ettiğinden sonra mezkûr Râbia Hâtun dahi cihet-i deyn-i şer‘îden bin beş yüz guruş hakkı olmağla mezkûreye bey‘ eylediğim eşyâya ve bahçe mülkleri olan bin beş yüz guruşu deyni olan bin beş yüz guruşa takās ol dahi kabûl etti. Ba‘de’l-yevm sâlifü’z-zikr bostan ve bahçe merkūme Râbia Hâtun’un irsen ve şirâ’en mülkü ve hakkı olup, benim alâkam kalmamışdır, keyfe mâ teşâ ve tahtâr mutasarrıfe olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: Abdülbâki Efendi b. Handen b. ( ), Yahya Çelebi b. Ahmed, Abdülbâki Çelebi b. ( ), Mehmed Çelebi b. Mehmed Efendi.