Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 401 Hüküm no: 463 Orijinal metin no: [74b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile bt. Abdullah’ın Mehmed Şakir Efendi’de olan alacağını tahsil etmesi İbrâ Mahmiye-i İstanbul’da ( ) mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Cemile bt. Abdullah nâm Hatun meclis-i şer‘-i şerîf-i enverde işbu bâ‘isü’l-vesîka Mehmed Şakir Efendi b. Esad mahzarında ikrâr-ı tam ve takrîr-i kelâm edip ben bundan akdem bir husûsun temşiyyeti için malımdan rüşvet nâmıyla beş yüz guruşumu merkūm Mehmed Şakir Efendi’ye teslîm, ol dahi yedimden ahz ü kabz ve istihlâk etmiş idi. El-hâletü hâzihî ben medfû‘um [75a] olan meblağ-ı mezbûr beşyüz guruşun üç yüz elli guruşunu rızâmla hatt ü tenzîl etmemle bâkīsi olan yüzelli guruş merkūm Mehmed Şakir Efendi bana def‘ ü teslîm ben dahi yedinden tamamen ve kâmilen ahz ü kabz edip husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan ve kâffe-i mutâlebâtdan merkūm Mehmed Şakir Efendi’nin zimmetini ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 7 Ş sene [1]242. Şühûdü’l-hâl: Muhzır İsmail Çelebi, Muhzır Emin Çelebi, Muhzır Abdulfettah Çelebi.