Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 401 Hüküm no: 464 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Anaştaş’ın Kandilli Şerbethanesindeki hissesini Acemoğlu Pretamoz’a satması Şerbethâne Mahrûse-i Galata’da Helvacı sokağında Küçük Sahrınçlı Şerbethânesi’nde mütemekkin Sava v. Anaştaş zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Acemoğlu Pretamoz v. Pretamoz zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Odunkapısı hâricinde Kandilli demekle meşhûr dokuz bâb oda ve tahtında kâin altı bâb mahzeni müştemil bir bâb kârgîr şerbethâne derûnunda mevcûde beyne’l-esnâf gedik ta‘bîr olunur elli iskemle ve otuz sofra ve yirmi beş fıçı ve yirmi bardak ve bir kantar ve bir destgâh ve sâir âlât-ı lâzıme-i ma‘lûme yüz yirmi sehm i‘tibârıyla iki sehmi benim ve yirmi beş sehmi Mihal zimmînin ve yirmi üç buçuk sehmi mersûm Acemoğlu Pretamoz zimmînin ve on buçuk sehmi Kostandi zevcesi Krosni Nasrâniyenin ve elli dokuz sehmi Aleksanderi zimmî veresesinin yedimizde iştirâken ve şâyi‘an emvâlimiz olmağla ben sâlifü’l-beyân âlât-ı lâzıme-i ma‘lûmede ber-i‘tibâr-ı merkūm mâlik olduğum iki sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile şerîkim mersûm Pretamoz zimmîye bin iki yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin iki yüz guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı lâzıme-i mezkûrenin yirmi beş sehmi mersûm Pretamoz zimmînin emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetiniibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 3 N sene [1]242. Şühûdü’l-hâl: Muhzır Ebûbekir Çelebi, Muhzır Feyzullah Çelebi, Muhzır Ali Çelebi, Lazaros v. Pasova, Yuvan v. Lazaros, Apostol v. Espozi, Zora v. Toros, İstefan v. Yuvakim, Kostandi v. Zenbil, Karalam v. Zakarya.