Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 402 Hüküm no: 465 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Anaştaş’ın Kandilli isimli şerbethanede olan hissesini satması Şerbethâne Mahrûse-i Galata’da Helvacı sokağında Küçük Sahrınçlı Şerbethânesinde mütemekkin Sava v. Anaştaş zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Mihal v. Pretamoz zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Odunkapısı hâricinde vâki‘ Kandilli demekle meşhûr dokuz bâb oda ve tahtında altı bâb mahzeni müştemil bir bâb kârgîr şerbethâne derûnunda mevcûde beyne’l-<> hıref gedik ta‘bîr olunur elli iskemle ve otuz sofra ve yirmi beş fıçı ve yirmi bardak ve bir kantar ve bir destgâh ve sâir âlât-ı lâzıme-i ma‘lûme yüz yirmi sehm i‘tibârıyla on beş sehmi benim ve yirmi üç buçuk sehmi Acemoğlu Pretamoz zimmînin ve on iki sehmi mersûm Mihal zimmînin ve on buçuk sehmi Kostandi zevcesi Krosni Nasrâniyenin ve elli dokuz sehmi Aleksanderi zimmî veresesinin yedimizde iştirâken ve şâyi‘an emvâlimiz olmağla ben sâlifü’z-zikr âlât-ı lâzıme-i ma‘lûmede ber-i‘tibâr-ı merkūm mâlik olduğum on beş sehmin iki sehmini yedimde ibkā ve mâ‘adâ on üç sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile şerîkim mersûm Mihal zimmîye yedi bin sekiz yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr yedi bin sekiz yüz guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı <> lâzıme-i muharrere-i mezkûrenin yirmi beş sehmi mersûm Mihal zimmînin emvâl-i mahzı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 3 N sene [1]242. Şühûdü’l-hâl: Muhzır Ebûbekir Çelebi, Muhzır İsmail Çelebi, Muhzır Ali Çelebi, Lazaros v. Sava, Yuvan v. Lazaros, Apostol v. Espozi, Zora v. Toros, İstefan v. Yuvakim, Kostandi v. Zenbil, Karalam v. Zakarya.