Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 403 Hüküm no: 466 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Hazer’in Kuyumcu dükkânı ve içindeki gedik olarak bilinen âletlerde olan hissesini satması 2000 guruş kuyumcu odası Mahmiye-i İstanbul’da Yenikapı hâricinde mütemekkin İstefan v. Hazer zimmî meclis-i şer‘-i hatîr-i lâzımü’t-tevkīrde işbu hâmiletü’r-rakīm Heri bt. Bogos Nasrâniye tarafından husûs-ı <<âti’l-beyânda>> âtîde tasdîka vekîl-i şer‘îsi Agob v. Gaspar zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Çarşı-yı kebîrde Halıcılar Hanı’nda sağ tarafda bakkāl dükkânı verâsında Kapudan Ahmed Ağa ile Kalcı Karabet zimmî odaları beynlerinde kâin bir bâb kuyumcu odası bâ-temessük-i mütevellî taht-ı tasarrufumda ve derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme dahi altı sehm i‘tibârıyla beş sehmi benim ve bir sehmi âharın yedimizde emvâlimiz olmağla ben oda-i mezkûru bundan akdem bedel-i ma‘lûm ve makbûz mukābelesinde bâ-ma‘rifet-i mütevellî mersûme Heri Nasrâniyeye ferâğ vetefvîz etmemle âlât-ı lâzıme-i ma‘lûmede dahi ber-i‘tibâr-ı mezkûr mâlik olduğum beş sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i [şer‘î] ve safka-i vâhide ile mersûme Heri Nasrâniyeye bâ-izn-i şerîk iki bin guruşa bey‘ ü temlik ve vech-i lâyıkı üzere teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki bin guruşu müşteriye-i mersûme bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı muharrere-i lâzıme-i ma‘lûmenin beş sehmi mersûme Heri Nasrâniyenin emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûme Heri Nasrâniyenin zimmetini ibrâ ve iskāt eylediğimde ol dahi ber-vech-i meşrûh ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 8 N sene [1]242. Şühûdü’l-hâl: Muhzır Ali Çelebi, Muhzır Mehmed Çelebi, Muhzır Feyzullah Çelebi.