Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 404 Hüküm no: 467 Orijinal metin no: [75a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoşeda Kadın’ın bazı alacaklarını tahsil etmek üzere Hacı Mehmed’i vekil tayin etmesi İsbât-ı Vekâlet Mahmiye-i Bursa’da İbrahim Paşa mahallesinde sâkine Hoşeda Kadın bt. Abdullah tarafından ber-vech-i vekâlet iddi‘â eden işbu bâ‘isü’l-vesîka el-Hâc Mehmed b. Osman meclis-i şer‘-i şerîf-i enverde el-Hâc Ahmed Efendi b. Süleyman mahzarında üzerine da‘vâ ve takrîr-i kelâm edip mezbûre Hoşeda Kadın’ın merkūm el-Hâc Ahmed Efendi zimmetinde cihet-i karzdan elli guruş alacak hakkı olmağla meblağ-ı mezbûre merkūm el-Hâc Ahmed Efendi’den taleb ve da‘vâ ve ahz ü kabza ve mahmiye-i İstanbul’da Firuzağa mahallesinde vâki‘ bâ-temessük-i mütevellî bi’l-icâreteyn taht-ı tasarrufunda olan ma‘lûmü’l-hudûd bir bâb menzil arsasını dahi bedel-i misli ve bâ-ma‘rifet-i mütevellî âhara ferâğa ve kabz-ı bedele ve makbûzunu kendüye îsâl ve teslîme ve husûs-ı mezkûr mütevakkıf olduğu umûrun küllîsine işbu yedimde olan bir kıt‘a vekâlet hücceti nâtıka olduğu üzere bundan akdem mahrûse-i mezbûrede şühûd [75b] mahzarlarında tarafeynden kabûlüme mevkūfe beni vekîl ve nâib-i menâb nasb ü ta‘yîn eylediğinde ben dahi haber-i vekâlet bana vâsıl oldukda vekâlet-i merkūmeyi kabûl etmemle meblağ-ı mezbûr elli guruşu merkūmdan vekâlet-i mahkiyem hasebiyle taleb ederim, suâl olunsun dedikde gıbbe’s-suâl merkūm el-Hâc Ahmed Efendi dahi cevâbında mezbûre Hoşeda Kadın’a zimmetinde cihet-i karzdan elli guruş deyni olduğunu ikrâr, müdde‘î-i merkūmun vekâleti ma‘lûmum değildir deyü inkâr edicek müdde‘î-i merkūmdan ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve mahrûse-i mezbûre ahâlisinden es-Seyyid Ahmed b. es-Seyyid Mehmed ve diğer es-Seyyid Ahmed b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûre Hoşeda Kadın’ın merkūm Ahmed Efendi zimmetinde cihet-i karzdan elli guruş alacak hakkı olup meblağ-ı mezbûru merkūmdan ve mahmiye-i İstanbul’da Firuzağa mahallesinde vâki‘ bâ-temessük-i mütevellî bi’l-icâreteyn taht-ı tasarrufunda olan ma‘lûmü’l-hudûd bir bâb menzil arsasını semen-i misli ve bâ-ma‘rifet-i mütevellî âhara ferâğa ve kabz-ı bedele ve makbûzunu kendüye îsâl ve teslîme ve husûs-ı mezkûr mütevakkıf olduğu umûrun küllîsine zâtını rü’yetimiz ile ma‘lûmumuz olan mezbûre Hoş Eda Kadın bt. Abdullah b. Hasan mahrûse-i Bursa’da işbu müdde‘î-i merkūm el-Hâc Mehmed’i işbu bir kıt‘a vekâlet hücceti nâtıka olduğu üzere kabûlüne mevkūfe tarafından vekîl ve nâib-i menâb nasb ü ta‘yîn eylediğinde ol dahi haber-i vekâlet kendüye vâsıl oldukda vekâlet-i merkūmeyi kabûl eyledi, biz bu husûsa bu vech üzere şâhidleriz ve şehâdet dahi ederiz deyü her biri müttefikü’l-lafz ve’l-ma‘nâ edâ-yı şehâdet-i şer‘iye ettiklerinde gıbbe ri‘âyeti şerâiti’l-kabûl şehadetleri makbûle olmağın mûcebince ba‘de’l-hükm ve’t-tenbîh mâ-vaka‘a [bi’t-taleb ketb olundu.] Fî 3 N sene [1]242. Şühûdü’l-hâl: Muhzır Ali Çelebi, Muhzır Fettah Çelebi.