Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 405 Hüküm no: 468 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve Ali Ağaların Darende’nin Hacılar köyünde bulunan menzil ve bahçelerini Hasan Ağa’ya satmaları Menzil ve Bahçe ferâğı, 2000 guruş Vilâyet-i Anadolu’da Darende kazâsına tâbi‘ Hacılar karyesi ahâlisinden olup mahrûse-i Galata’ya muzâfe kasaba-i Kasımpaşa’da sâkinler Mehmed Ağa b. Osman ve Ali Ağa b. Mehmed Emin meclis-i şer‘-i şerîf-i enverde yine kazâ-i mezbûr ahâlisinden işbu bâ‘isü’l-vesîka Hasan Ağa b. Ali mahzarında her biri ikrâr-ı tam ve takrîr-i kelâm edip ale’l-iştirâk taht-ı tasarrufumuzda olup karye-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilimizi bin iki yüz otuz dokuz senesi yüz guruş bedel mukābelesinde ve yine ale’l-iştirâki’s-seviyy bâ-temessük tasarrufumuzda olup bir tarafdan hark ve bir tarafdan ırmak ve bir tarafdan Ali Bey bahçesi ve bir tarafdan ba‘zan Nakkāşoğlu bahçesi ve ba‘zan tarîk ile mahdûd eşcâr-ı müsmire ve gayr-ı müsmireli bir kıt‘a vakıf bahçemizi bin dokuz yüz guruş bedel mukābelesinde bâ-ma‘rifet-i mütevellî târih-i mezbûrda mezbûr Hasan Ağa’ya ferâğ ve tefvîz ve mahâllinde zabta ve tasarrufa tarafımızdan merkūmu taslît eylediğimizde ol dahi ber-vech-i muharrer tefevvüz ve kabûl eyledikden sonra bedel-i merkūm iki bin guruşu târih-i mezbûrda bize def‘ ü teslîm biz dahi yedinden tamamen ahz ü kabz edip menzil-i mahdûd-ı mezkûr ve zikr olunan bahçe mezbûr Hasan Ağa’nın târih-i mezbûrdan beri dâhil-i havza-i tasarrufu olup bizim târih-i mezbûrdan beri kat‘a alâka ve medhalimiz kalmamağla ferâğ-ı mezkûrun adem-i sıhhatine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 21 Ş sene [1]242. Şühûdü’l-hâl: Muhzır Ali Çelebi, Eyüblü Mustafa Ağa, Derviş Mehmed Ağa, Eyüb Ağa, Muhzır Ebûbekir Çelebi.