Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 406 Hüküm no: 469 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süvari Ali Ağa’nın Camcı dükkânı gediğini Hacı Ahmed Ağa b. Mehmed’e satması Camcı, 200 guruş mübâya‘a. Mahmiye-i İstanbul’da Aksaray kurbünde Muradpaşa mahallesinde sâkin Asâkir-i mansûre süvârîlerinden Ali Ağa b. Mehmed meclis-i şer‘-i şerîf-i enverde camcı esnâfından işbu bâ‘isü’l-vesîka el-Hâc Ahmed Ağa b. İsmail mahzarında ikrâr-ı tam ve takrîr-i kelâm edip mahmiye-i mezbûrede Sultan Bâyezid-i Veli Câmi‘-i şerîfi kurbünde Buğdaycılar kapısı civârında şekerci ve peştahtacı dükkânları beynlerinde vâki‘ bir bâb camcı dükkânı derûnunda mevcûde beyne’l-esnâf gedik ta‘bîr olunur bir destgâh ve bir çekmece ve bir tekne ve bir tas ve bir mala ve bir akçe tahtası ve sâir âlât-ı lâzıme-i ma‘lûme dört sehm i‘tibârıyla bir sehmi benim ve mâ‘adâ üç sehmi merkūm el-Hâc Ahmed Ağa’nın yedimizde bâ-hüccet-i şer‘iye şâyi‘an emvâlimiz olmağla ben âlât-ı muharrere-i mezkûrede ber-i‘tibâr-ı mezkûr mâlik olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Ahmed Ağa’ya iki yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikdensonra semeni olan meblağ-ı mezbûr iki yüz guruşu müşteri-yi merkūm el-Hâc Ahmed Ağa yedinden tamamen ahz ü kabz eyledim, fîmâ-ba‘d âlât-ı muharrere-i mezkûrenin mecmû‘u merkūm el-Hâc Ahmed Ağa’nın müstakıllen emvâli olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt eyleyip ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 11 N sene [1]242. Şühûdü’l-hâl: Kethudâ Halil Ağa, Mütevellî Mehmed Emin Ağa, Çizmeci Mehmed Ağa, Camcı Mehmed Efendi, Ali Çelebi el-muhzır, Ebûbekir Çelebi el-muhzır.